Sériq Uyghurlarning nöwette millet süpiti bilen "Tragédiyelik tallash"qa duch kéliwatqanliqi melum bolmaqta

Muxbirimiz qutlan
2016-10-02
Share


Sériq Uyghurlar yaki yughurlar xitayning gensu ölkisi sunen sériq Uyghur aptonom nahiyeside yashap kéliwatqan charwichi xelq bolup, tarixchilar ularni orxun Uyghur xanliqi we genjo Uyghur xanliqidin qep qalghan qedimki Uyghurlarning ewladliri, dep qaraydu.

"Nyo-york waqit géziti" aldinqi küni sériq Uyghurlar we ularning nöwettiki tragédiyelik qismiti heqqide ikki parche maqale élan qilghan bolup, uningda xitaydiki qedimiy medeniyetke ige sani az bir xelqning til, medeniyet we milliy mewjutluq jehettin yoqilish girdabigha qarap mangghanliqi bayan qilin'ghan.

Melumki, sériq Uyghurlar genjo Uyghur xanliqi yimirilgendin kéyin chilyen taghliri bilen xéshi karidori ariliqida qep qalghan qedimki Uyghurlarning qalduqliri bolup, ular 16-esirdin kéyin Uyghur diyaridin sherqqe qachqan buddist Uyghurlar bilen qoshulup hazirqi sériq Uyghurlarni shekillendürgen.

Sériq Uyghurlarning hazirqi omumiy nopusi 13 ming etrapida bolup, ular til perqi sewebidin sherqiy sériq Uyghurlar we gherbiy sériq Uyghurlar dep ikkige ayrilghan. Sherqiy sériq Uyghurlar mongghol tilining én'gar di'aléktide, gherbiy sériq Uyghurlar qedimki Uyghur tilida sözlishidiken. Ular diniy étiqad jehettin tibet buddizimigha étiqad qildiken.

Yéqinqi yillardin buyan sériq Uyghurlar bilen Uyghur diyaridiki Uyghurlarning til, medeniyet we qan-qérindashliq jehettiki baghlinishliri köpligen tetiqatchilarning qiziqishini qozghimaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.