Фирансийә агентлиқи: “сәуди әрәбистандики уйғурлар имкансиз таллашқа дуч кәлмәктә”

Мухбиримиз әркин
2020-01-27
Share

Сәуди әрәбистандики уйғурларниң паспорт қәрәлиниң тошуп кетиши яки тошуп кетишкә аз қелиши сәвәблик қийин әһвалда қеливатқанлиқи илгири сүрүлди.

Фирансийә агентлиқиниң хәвәр қилишичә, нөвәттә сәудидики хитай әлчиханисиниң уйғурларға паспорт узартип беришни тохтатқанлиқи сәвәблик улар паспортсиз қелиш яки хитайға қайтип лагерларға қамилиштәк имкансиз бир таллашқа дуч кәлмәктикән.

Фирансийә агентлиқиниң мухбири сәуди әрәбистанда турушлуқ паспорт қәрәли өтүп кәткән яки өтүп кетиш алдидики 6 уйғур аилиси билән учрашқан. Хәвәрдә, уларниң бир милйондин артуқ уйғур лагерларда тутуп турулуватқан хитайға қайтип кетиштин вәһимигә чүшкәнлики тәкитләнгән.

Хәвәрдә қәйт қилинишичә, хитайниң сәудидики дипломатик органлириниң уйғурларға паспорт йеңилап беришни тохтатқиниға 2 йилдин ашқан болуп, паалийәтчиләр бу усулни хитайниң чәтәлдики уйғурларни хитайға қайтуруп кетиш үчүн қоллиниватқан бир хил тактикиси, дәп қаримақтикән. Хәвәрдә, мәдинидә оқуватқан 30 яшлардики бир уйғур оқуғучиниң сөзи нәқил кәлтүрүлгән болуп, бу оқуғучи: “улар я мениң паспортумни йеңилап бериши керәк яки мән пуқралиқтин ваз кечишим керәк. Улар бизни һечқандақ қиммити йоқ адәмләрдәк һес қилдурмақта” дегән. Норвегийәдә турушлуқ уйғур паалийәтчи абдувәли аюпниң фирансийә агентлиқиға билдүрүшичә, “хитайниң чәтәлдики уйғурларға паспорт йеңилап беришни рәт қилиши уларни имкансиз әһвалға чүшүрүп қоюп, хитайға қайтуруп кетишкә мәҗбурлаштики бир хил истратегийәси” икән. У “әгәр қайтип барса уларни күтүп турғуни тутқундур” дегән. Сәуди әрәбистан хитайниң 2017‏-йили башлиған уйғур районидики кәң көләмлик тутқунида бейҗиңни қоллап кәлгәниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт