Se'udi erebistan weli'ehid shahzadisi bin salman xitay "Radikalliqqa qarshi turush tebirliri" ni qollighan

Muxbirimiz erkin
2019-02-22
Share

Xitayda ziyarette boluwatqan se'udi erebistan weli'ehid shahzadisi, yeni text warisi muhemmed bin salman xitayning "Térrorluq" we "Radikalliq" qa qarshi turush tedbirlirini élish hoquqi barliqini bildürgen.

Xitay axbarat wasitilirining ilgiri sürüshiche, u 22‏-féwral küni xitay re'isi shi jinping bilen körüshkende bu sözlerni qilghan.

Muhemmet bin salman xitay hökümiti Uyghurlarning medeniyiti we diniy étiqadini qattiq cheklep, 800 mingdin 2 milyon'ghiche Uyghurni yighiwélish lagérlirigha qamishi xelq'arada qattiq tenqidke uchrawatqan bir waqitta xitayni ziyaret qildi. Shunga, xelq'ara közetküchiler uning bu ziyariti, Uyghur mesilisini otturigha qoyup, özining islam dunyasida rehberlik rolini jari qildurushi üchün yaxshi purset ikenlikini ilgiri sürgen.

Amérikining blumbérg xewerliride 21‏-féwral küni élan qilin'ghan bir maqalide, se'udi xan jemetining özini "Ikki heremning qoghdighuchisi" dep ataydighanliqi, shunga, muhemmed bin salmanning lagérlar mesilisini otturigha qoyushining qanunluq ikenliki, bu uning xelq'aradiki nachar obrazini yaxshilishigha azraq bolsimu paydiliq ikenliki ilgiri sürgen idi. Lékin, xitay merkizi téléwiziye istansisining xewiride bayan qilinishiche, muhemmed bin salman shi jinpinggha "Xitayning térrorluqqa qarshi turush, diniy esebiylikni tügitish tedbirlirini élip, dölet bixeterlikini qoghdash heqqi bar" dégen.

Lékin, bin salmanning rast bu sözni qilghan-qilmighanliqi hazirgha qeder se'udi hökümiti teripidin delillenmidi. Se'udi erebistan hazirgha qeder bashqa musulman döletlirige oxshashla xitayning Uyghur rayonidiki musulmanlargha tutqan mu'amilisige süküt qilip kelgen. Roytérs agéntliqining jüme küni xewer qilishiche, bin salmanning ziyariti b d t kishilik hoquq kéngishining pesillik yighini bashlinish harpisida élip bérilghan.

Roytérsning xewiride, yighinda xitayning lagérlar mesiliside, se'udi erebistanning se'udiliq zhurnalist jamal qoshuqchining istanbuldiki se'udi konsulxanisida öltürülüshi seweblik qattiq tenqidke uchrishi mumkinliki bildürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet