Ereb birleshme xelipiliki xitayning atalmish "Térrorluqqa qarshi kürishi" ni qollaydighanliqini bildürgen

Muxbirimiz sada
2019-07-23
Share

Ereb birleshme xelipilikining weli'ehdi muhemmed bin zayid al-nahyan 22-iyul béyjingdiki ziyaritide xitayning Uyghur diyarida élip bériwatqan atalmish "Térrorluqqa qarshi kürishi" ni küchlük yosunda qollaydighanliqini bildürgen.

Pakistanda chiqidighan "Sübhi" (Dawn) gézitining 23-iyuldiki xewirige qarighanda, muhemmed bin zayid Uyghur diyarining weziyiti heqqide shi jinpinggha söz qilip, "Ereb birleshme xelipiliki xitay hökümitining az sanliq milletlerning hoquqini qoghdash jehettiki tirishchanliqlirigha yüksek derijide qayil," dégen. Uning bu sözliri xitay merkiziy téléwiziye qanilida anglitilghan.

Xewerde ilgiri sürülüshiche, muhemmed bin zayid sözide ereb birleshme xelipilikining xitay bilen birlikte "Ashqun térrorchi küchler" ge zerbe bérishtiki "Birleshme jengge" qatnishidighanliqini, yeni béyjing da'iriliri Uyghurlarni "Térrorchi" dep körsitishte "Bahane" boluwatqan atalmish "Sherqiy türkistan islam herikiti" ni yoqitishta hemdemde bolidighanliqini qeyt qilghan.

Xewerdin melum bolushiche, muhemmed bin zayidning yuqiriqi sözliri béyjing da'irilirining Uyghurlar mesiliside xelq'aradin chiqiwatqan naraziliq pikirlerge taqabil turush üchün "Dost izdiniwatqan" mezgilige toghra kelgen.

12-Iyul xitayning Uyghur élidiki siyasitini qollap b d t gha xet yazghan 37 döletning ichide ereb birleshme xelipilikimu bar idi. Démokratik eller bu döletlerning qilmishigha küchlük reddiye bériwatqan peytte muhemmed bin zayidning xitay ziyariti xelq'araning diqqet nuqtisigha aylan'ghan.

Közetküchiler, ereb birleshme xelipilikige oxshash bir musulman dölitining bu qilmishi uning Uyghurlar mesilisidin özini qachurup xitaygha "Yantayaq" boluwatqanliqidin bashqa nerse emes, déyishmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet