Se'udi erebistan xitay tilini resimi derslik qatarigha kirgüzgen

Muxbirimiz erkin
2019-08-19
Share

Se'udi erebistan hökümiti xitay tilini özining ottura mektep we uniwérsitétlarni öz ichige alghan her derijilik ma'arip qatlamlirigha resmiy derslik qilip kirgüzüshni qarar qilghan.

Se'udi erebistan taratqulirida, se'udi erebistanning bu toghrisida xitay bilen resmiy kélishim imzalan'ghanliqi, ikki terepning bu mesilide se'udi erebistan weli'ehdi shahzadisi muhemmet bin salman xitayni ziyaret qilghanda pikir birliki hasil qilghanliqi ilgiri sürülmekte.

Muhemmet bin salman bu yil 2‏-ayda xitayni ziyaret qilghan. U shi jinping bilen körüshkende xitayning Uyghur aptonom rayonida ijra qiliwatqan "Térrorluqqa" qarshi turush tedbirlirini qollaydighanliqini bildürgen. U "Xitay özining dölet bixeterliki üchün térrorluq we diniy ashqunluqqa qarshi tedbir élish hoquqi bar" dégen.

Özini musulmanlarning "Hammisi", "Ikki heremning xizmetkari" dep qaraydighan se'udi erebistan padishahi weli'ehdining xitay hökümiti 2 milyondek Uyghur, qazaq qatarliq musulmanlarni yighiwélish lagérlirigha qamap, Uyghur jem'iyitige qarita omumyüzlük teqibleshni yolgha qoyghan bir waqitta bu sözlerni qilishi, muhajirettiki Uyghurlar we xelq'ara kishilik hoquq teshkilatlirini qattiq naraziliqini qozghighan.

Közetküchiler, bin salmanning se'udi erebistanliq zhurnalisti jamal qashuqchining istanbuldiki se'udi konsulxanisida öltürülüshi seweblik xelq'arada yétim qalghanliqi, shunga uning Uyghur rayonida musulmanlarning diniy étiqadining depsende qilinishigha köz yumup, xitayni özi üchün "Bir chiqish yoli" dep qarawatqanliqini ilgiri sürgen. Lékin, se'udi taratqulirining bildürüshiche, xitay tilining derslikke kirgüzülüshi se'udi erebistan oqughuchilirining medeniyette köp xillishishini algha sürüp, se'udi erebistanning ma'arip sahesidiki 2030‏-yilliq milliy tereqqiyat pilanini emelge ashurushigha türtke bolidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet