Shah mehmud Uyghurlarning ziyankeshlikke uchrishi toghrisida söz qilishni ret qildi

Fransiyediki charliy xabdu karton weqesi we pelestindiki musulmanlarning ziyankeshlikke uchrishi heqqide eng küchlük pikir bayan qilghan musulman döletliridin pakistan hökümiti Uyghurlar mesiliside izchil sükütte turup kelgen idi. Ötken hepte pakistan tashqiy ishlar ministiri shah mehmud qureysh bir qétimliq téléwiziye ziyaritide CNN ning muxbiri sorighan Uyghurlar heqqidiki so'algha yene bir qétim ashundaq mewhum shekilde jawab bergen.

Muxbir amérika hökümiti we bashqa sahening “Uyghurlar irqiy qirghinchiliqqa duch kéliwatidu” dégen mezmunda xitay hökümitini eyibligenlikini eskertip: “Siler néme üchün bu heqte zuwan sürmeysiler?” dep sorighan. Shah mehmud bolsa özlirining xitay bilen bolghan dostluq alaqisini alahide tekitligen hemde xitayni bu mesilide ashkara eyibliyelmeydighanliqidin bisharet bergen. Shuningdek bu mesile toghrisida “Diplomatik yollar” arqiliq sözlishiwatqanliqini hemde hemmila ishni ashkara dep yürgili bolmaydighanliqini tekitligen. Muxbir “Xitay hazir qirghinchiliq qiliwatidu. Siler iqtisadiy menpe'et üchün buni körmeske séliwatamsiler?” dégende, shah mehmud: “Hemmila ishning yoli bolidu. Biz özimizning mes'uliyitini untup qalghidek derijide emes,” dégen.

Xitay hökümitining iqtisadiy jehettiki kontrolluqi sewebidin köpligen islam döletliri Uyghurlar mesiliside süküt qiliwatqan bolup, pakistan hökümiti izchil “Xitayning eng yéqin guppangchisi” dep qariliwatqanliqi melum. Pakistan bash minstiri imran xanmu birnechche qétim bu heqtiki so'allargha jawab bérishtin özini chetke alghan idi.