Qazaqistan'gha qéchip chiqqan toqquztaraliq qazaq ayal lagérdiki basqunchiliq weqesini ashkarilidi

Muxbirimiz erkin
2019-09-23
Share

2018‏-Yili5‏-ayda qazaqistan'gha qéchip chiqqan qayshe aqan isimlik toqquztaraliq bir qazaq tijaretchi ayal radi'omizda özining qazaqistan'gha qéchip chiqishi we toqquztaradiki bir qizning lagérda basqunchiliqqa uchrap hamilidar bolup qalghanliqini ilgiri sürdi.

Lagérda ayal tutqunlarning basqunchiliqqa uchrawatqanliqigha da'ir uchurlar burun tarqalghan bolsimu, lékin hazirgha qeder héchkim bundaq bir weqege ashkara guwahliq bérip baqmighan idi. Qayshe aqanning 21‏-séntebir küni radi'omiz xitay bölümining muxbirigha bildürüshiche, u Uyghur ili-qazaqistan otturisida qatnap soda qilidighan tijaretchi bolup, u ötken yili 5‏-ayning 4‏-küni yerlik saqchilar teripidin soraq qilin'ghan. Saqchilar uning pasportini 3 kün ichide tapshurup bérishini telep qilghan iken. Qayshe aqan radi'omizgha bergen uchurida buning özide endishe qozghighanliqi, shuning bilen bu 3 kün ichide qazaqistan'gha qéchip chiqip, panahliq tiligenlikini bildürgen. 

Qayshe aqanning bu ishlarni néme üchün bir yil 4 aydin kéyin ashkarilighanliqi bizge namelum. Emma qazaqistandiki "Ata yurt" namliq kishilik hoquq teshkilatining radi'omizgha bildürüshiche, qayshe aqan bu teshkilatning yardimide ötken hepte özining kechürmishini ashkarilashni qarar qilghan iken. U radi'omizgha bergen uchurida özining dehshetlik bir tragédiyege shahit bolghanliqi, u tonuydighan kichik bir qizning lagérdin qoyup bérilgende yéngi tughulghan bir bowaq balini élip chiqqanliqi, halbuki, uning lagérda basqunchiliqqa uchrap, bu bowaqqa hamilidar bolup qalghanliqini bildürgen.

"Atayurt" teshkilatining ilgiri sürüshiche, nöwette qayshe aqan qazaqistanda siyasiy panahliq mesilisige duch kelgen. Qazaqistan hökümiti ötken yili qayshe aqan'gha oxshash qazaqistan'gha qéchip chiqqan sabiq lagér oqutquchisi sayragül sa'utbaygha panahliq bérishni ret qilghan. Sayragül sa'utbaygha bu yil 6‏-ayda shwétsiye panahliq bergen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet