Xitayning shangxey shehiride korona wirusidin ‍ölgenler shiddetlik köpeygen

Muxbirimiz erkin
2022-04-25
Share

24-Aprél küni, xitayning shangxey shehiride korona wirusidin yuqumlan'ghanlar 20 minggha yéqinliship, 51 adem ‍ölgen. Radi'omiz xitay bölümining xewer qilishiche, yéqinda shangxeyning jyading rayonidiki bir jeset köydürüsh zawutida jesetlerni bir terep qilish mesilisi seweblik kélip chiqqan majiradin mezkur zawutta 4-ayning 1-künidin bashlap barliq xizmetchilerning zawuttin ayrilishi cheklen'genliki, bu zawutning her küni kéchisi sa'et 12 giche jeset köydüridighanliqi ashkarilan'ghan. Xewerde, ‍ölgenlerning ‍ötken yilning ‍oxshash mezgilidikidin ikki hesse köpeygenliki, biraq xitay taratqulirida buninggha a'it uchurning cheklen'genliki ilgiri sürülgen.

Shangxey shehiridiki yene bir jeset köydürüsh zawutidiki xadimlar radiyomizgha bergen uchurida, özlirining xizmet salmiqi burunqidin éship ketkenlikini éytqan, biraq konkrét sanliq melumat bilen teminleshni ret qilghan. Xewerde éytilishiche, buningdin sirt shangxeyning xu'angpu, pudong rayonliridiki ahaliler xitayning qattiq karantin tedbirlirige qarshi tömür rishatkilarni buzup tashlap qarshiliq bildürgen. Shangxey sheherlik sehiye komitétining 25-aprél bildürüshiche, ötken bir kün ichide 2472 neper késellik alamiti bar yerlik korona wirusi yuqumdari bayqalghan, késellik alamiti yoq yerlik yuqumdarlar 16983 ge yétip 51 adem ‍ölgen.

En'gliye “Muhapizetchi” gézitining xewer qilishiche, korona wirusining ötken hepte béyjingghimu tarqilishi béyjing ahalisini sarasimige sélip, yémek-ichmek sétiwélish dolquni qozghalghan. Béyjing shehiri ötken jüme küni 47 neper korona wirusi yuqumdari bayqalghanliqi, yuqumdarlarning yérimining chawyang rayonida bayqalghanliqini élan qilghan. Da'iriler bu hepte ichide chawyang rayonidiki 3 yérim milyon ahalige qarita emlesh élip baridighanliqini bildürgen. “Muhapizetchi” gézitining éytishiche, xitay döletlik sehiye komitéti 25-aprél xitay miqyasida 3266 neper késellik alamiti bar yuqumdar, 20454 neper késellik alamiti yoq yuqumdar bayqalghanliqini élan qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet