Shangxey da'iriliri yéngi yil patparaqchiliqining dollar taliship kélip chiqqanliqini ret qilghan

Muxbirimiz erkin
2015-01-02
Share

Shangxey da'iriliri yéngi yil kéchisi shangxey weytende yüz bergen patparaqchiliqning dollar taliship kélip chiqqanliqini ret qilghan. Shangxey j x da'irilirining ilgiri sürüshiche, dollar chéchish weqesi parparaqchiliqtin kéyin yüz bergen.

Lékin shinxu'a agéntliqi jüme künki xewiride, weqening konkrét sewebi téxi éniqlanmighanliqini, alaqidar organlarning mes'uliyetni bashqilargha artip qoyup qutulushi qiyinliqini bildürdi.

31‏-Dékabir, shangxey weytendiki yéngi yilni kütüwélish pa'aliyitide patiparaqchiliq yüz bérip, az dégende 36 adem ölgen, 49 adem yarilan'ghan. Ölgenlerning mutleq köp qismi ayallar. Shangxey sheherlik hökümet jüme küni weqede ölgen 32 kishining tizimlikini élan qilghan.

Deslepki xewerlerde ashkarilinishiche, bir kishi ademler topigha dollar chachqan, dollar taliship kélip chiqqan patiparaqchiliqta nurghun adem ölgen.

Firansiye agéntliqi jüme küni tarqatqan xewer analizida, bu weqe xitayning yoshurun ajizliqini ashkarilap qoyghanliqini ilgiri sürdi. Xewer analizida körsitishiche, bu weqede xitay da'irilirining teshkillik zor yighilishlarni qattiq kontrol qilalisimu, biraq özlükidin toplan'ghan awam xelqni bashqurushta tejribisiz ikenliki ashkarilinip qalghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet