Saqchilar shayarda ramizanning axirqi künidiki tarawini qan'gha boyidi

Muxbirimiz erkin
2013-08-08
Élxet
Pikir
Share
Print

Türkiyediki sherqiy türkistan ammiwi teshkilatlirining ashkarilishiche, xitay saqchiliri ramizanning axirqi küni aqsuning shayar nahiyesidiki sultanem meschitining jama'étini oqqa tutup, az dégende 4 muxlisni öltürgen we nurghun ademni yarilandurghan.

Mezkur weqe yerlik da'iriler teripidin téxi ispatlanmighan bolsimu, biraq Uyghur aptonom rayonluq qanun tarmaqliri yéqinda diniy küchlerge nuqtiliq zerbe bérish heqqide yolyoruq bérip, kishilik hoquq teshkilatlirining endishisini qozghighan idi.

Nöwette, sultanem meschitining jama'étini oqqa tutush weqesi heqqide ikki xil qarash mewjut. Bir xil qarash, xitay saqchiliri tarawi oquwatqan meschitke bésip kirip, bir qisim kishilerni tutup ketken. Meschit jama'éti saqchigha naraziliq bildürüp barsa, saqchilar ammini oqqa tutqan.

Yene bir xil qarash, saqchilar tarawi oquwatqan meschitke basturup kirip, buninggha naraziliq bildürgen meschit jama'étini oqqa tutup, ölüm-yétimni keltürüp chiqarghan. Bu weqening Uyghur aptonom rayonluq xelq qurultiyi 2‏-awghust qarar chiqirip, diniy küchlerni qattiq basturushni buyrughan, aptonom rayonluq partkom siyasiy qanun komitéti sékrétari shyung shyen'goning 5‏-awghust, her derijilik sot mehkimilirige yolyoruq bérip, zerbe bérish nishanini nuqtiliq diniy küchlerge qaritishni telep qilghandin kéyin yüz bérishi diqqet qozghidi.

Toluq bet