Wilson merkizi sheng shiseyning 1934-yili 6-ayda stalin'gha yazghan mexpiy xétini élan qilghan

Muxbirimiz qutlan
2017-01-14
Share


Bash shitabi washin'gtondiki wilson tetqiqat merkizi yéqinda shéng shiseyning 1934-yili 6-ayda stalin'gha yollighan mutleq mexpiy mektubliridin birini élan qilghan.

Mezkur mektubta shéng shisey intayin chirayliq we debdebilik ibarilerni qollinip, özining yaponiyede oquwatqan chaghliridin bashlapla markisizmgha eqide baghlighanliqi, "Kapital", "Kommunistik partiye xitabnamisi" we "Gota programmisigha tenqid" qatarliq eserlerni qétiqinip ögen'genliki shundaqla özining kompartiye ezasi bolush arzusidin bir künmu qaytmighanliqini bayan qilghan.

Jem'iy 14 nuqta boyiche yézilghan shéng shiseyning bu uzun mektubida uning nenjingdiki gomindang hökümitidin qol üzüp, xitayda bir kommunistik hakimeyetning meydan'gha kélishige tirishchanliq körsetmekchi bolghanliqi, buning üchün aldi bilen özi idare qiliwatqan Uyghur diyarida kompartiyening bir shöbisini qurushni oylawatqanliqini izhar qilghan.

U mezkur mektubta sowét ittipaqi rehberliridin stalin, molotof we woroshiloflarning uning sowét bolshéwiklar partiyesige eza bolup kishige qolushulishini ötünüp sorighan.

Shéng shisey mezkur mektubning béshida yene sowét ittipaqining Uyghur diyaridiki isyanlarni tinjitip, öz hakimiyitining ma jungyingning tehlikisidin qutulushigha yardem bergenlikige alahide minetdarliq bildürgen.

Tarixchilar, shéng shiseyning mezkur mektubining 1934-yili 6-ayda stalin'gha yollan'ghanliqini, bu mezgilde shéng shiseyning sowét qizil armiyesining herbiy yardimige tayinip ma jungyingni tarmar qilghanliqi, shuning bilen bir waqitta yene sowét ittipaqining wastisi bilen xojaniyaz haji bashchiliqidiki Uyghur qozghilangchilirini sülhige keltürüp, öz hakimiyitige kéliwatqan qosh xiristin waqitliq qutulghanliqini tilgha alidu.

Ular yene bu mektub eyni waqitta shéng shiseyning sowét ittipaqigha tayinip aldi bilen Uyghur diyarining hökümrani bolush, axirida xitayda qurulghusi kommunistik hakimiyetning rehbiri bolushtek bir siyasiy qara niyitini ashkarilap béridu, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.