Америка президенти җов байден ши җинпиң билән өткүзгән тунҗи сөһбитидә уйғур кишилик һоқуқ мәсилисини оттуриға қойди

Мухбиримиз ирадә
2021-02-11
Share
Америка президенти җов байден ши җинпиң билән өткүзгән тунҗи сөһбитидә уйғур кишилик һоқуқ мәсилисини оттуриға қойди Хитай рәиси ши җинпиң билән американиң сабиқ муавин президенти җов байден ташқи ишлар министирлиқида чүшлүк тамақта. 2015-Йили 25-сентәбир, вашингтон.
REUTERS

Америка президенти җов байден 10-феврал күни кәчтә, хитай дөләт рәиси ши җинпиң билән телефонда көрүшүп, кишилик һоқуқ, сода вә килимат мәсилилири үстидә сөһбәтләшкән.

Ақсарайниң бу һәқтики баянатида мундақ дейилгән: "президент байден сөһбәттә америка хәлқиниң бихәтәрлики, гүллиниши, сағламлиқи вә турмуш усулини қоғдаш, әркин вә очуқ һинди-тинч окян районини қоғдаштәк өз сияситидики муһим нуқтиларни муәййәнләштүрди".

Мәлум болушичә, президент байден сөһбәттә хитайниң уйғур елидә йолға қоюватқан сиясәтлири һәққидики әндишилириниму ипадә қилған болуп, ақсарай баянатида бу һәқтики инчикә тәпсилатлар үстидә тохталмай туруп төвәндикиләрни дегән:

"президент байден бейҗиңниң мәҗбурлаш характеридики адаләтсиз тиҗарәт усули, хоңкоңдики бастуруш, шинҗаңдики кишилик һоқуқ дәпсәндичилики, тәйвән вә шундақла райондики зомигәрлик позитсийәси һәққидики күчлүк әндишини тәкитлиди".

Бу, америка президенти җов байден вәзипигә олтурғандин буян тунҗи қетим хитай дөләт рәиси ши җинпиң билән сөһбәтлишиши болуп, униң тунҗи сөһбәттила икки дөләт арисидики ядролуқ пәрқләргә вәкиллик қилидиған кишилик һоқуқ, сода вә хәлқара бихәтәрлик мәсилилирини оттуриға қоюши диққәт қозғайдикән.

"вал-ситрет журнили" ниң хәвиридин қариғанда, президент җов байдин чаршәнбә күни хитай дөләт рәиси ши җинпиң билән көрүшүштин бурун, явропа вә асиядики бир түркүм иттипақдашлири билән сөзләшкән болуп, бу, униң хитайға ялғуз тақабил турушни әмәс, бәлки һәрқайси демократик шерик дөләтләрниң лидири сүпитидә хитайға ортақ тақабил турушни көзләватқанлиқидин бешарәт беридикән.

Мәлум болушичә, икки рәһбәр йәнә COVID-19 вирус юқумиға қарши туруш, дуня сәһийә бихәтәрлики, килимат өзгириши вә ядро қораллириниң кеңийип кетишиниң алдини елиш қатарлиқ мәсилиләр үстидиму пикир алмаштурған.

Ақсарайниң баянатида ейтилишичә, президент байден америка хәлқи вә иттипақдашлириниң мәнпәәтини илгири сүргәндә чоқум әмәлий вә нәтиҗә һасил қилишни асас қилған һалда һәрикәт қилидиғанлиқини тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт