Amérika prézidénti jow baydén shi jinping bilen ötküzgen tunji söhbitide Uyghur kishilik hoquq mesilisini otturigha qoydi

Muxbirimiz irade
2021-02-11
Share
Amérika prézidénti jow baydén shi jinping bilen ötküzgen tunji söhbitide Uyghur kishilik hoquq mesilisini otturigha qoydi Xitay re'isi shi jinping bilen amérikaning sabiq mu'awin prézidénti jow baydén tashqi ishlar ministirliqida chüshlük tamaqta. 2015-Yili 25-séntebir, washin'gton.
REUTERS

Amérika prézidénti jow baydén 10-féwral küni kechte, xitay dölet re'isi shi jinping bilen téléfonda körüshüp, kishilik hoquq, soda we kilimat mesililiri üstide söhbetleshken.

Aqsarayning bu heqtiki bayanatida mundaq déyilgen: "Prézidént baydén söhbette amérika xelqining bixeterliki, güllinishi, saghlamliqi we turmush usulini qoghdash, erkin we ochuq hindi-tinch okyan rayonini qoghdashtek öz siyasitidiki muhim nuqtilarni mu'eyyenleshtürdi".

Melum bolushiche, prézidént baydén söhbette xitayning Uyghur élide yolgha qoyuwatqan siyasetliri heqqidiki endishilirinimu ipade qilghan bolup, aqsaray bayanatida bu heqtiki inchike tepsilatlar üstide toxtalmay turup töwendikilerni dégen:

"Prézidént baydén béyjingning mejburlash xaraktéridiki adaletsiz tijaret usuli, xongkongdiki basturush, shinjangdiki kishilik hoquq depsendichiliki, teywen we shundaqla rayondiki zomigerlik pozitsiyesi heqqidiki küchlük endishini tekitlidi".

Bu, amérika prézidénti jow baydén wezipige olturghandin buyan tunji qétim xitay dölet re'isi shi jinping bilen söhbetlishishi bolup, uning tunji söhbettila ikki dölet arisidiki yadroluq perqlerge wekillik qilidighan kishilik hoquq, soda we xelq'ara bixeterlik mesililirini otturigha qoyushi diqqet qozghaydiken.

"Wal-sitrét zhurnili" ning xewiridin qarighanda, prézidént jow baydin charshenbe küni xitay dölet re'isi shi jinping bilen körüshüshtin burun, yawropa we asiyadiki bir türküm ittipaqdashliri bilen sözleshken bolup, bu, uning xitaygha yalghuz taqabil turushni emes, belki herqaysi démokratik shérik döletlerning lidiri süpitide xitaygha ortaq taqabil turushni közlewatqanliqidin bésharet béridiken.

Melum bolushiche, ikki rehber yene COVID-19 wirus yuqumigha qarshi turush, dunya sehiye bixeterliki, kilimat özgirishi we yadro qorallirining kéngiyip kétishining aldini élish qatarliq mesililer üstidimu pikir almashturghan.

Aqsarayning bayanatida éytilishiche, prézidént baydén amérika xelqi we ittipaqdashlirining menpe'etini ilgiri sürgende choqum emeliy we netije hasil qilishni asas qilghan halda heriket qilidighanliqini tekitligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet