Shi jinpingning olimpik meydanlirini közdin kechürüshi diqqet qozghidi

Muxbirimiz eziz
2022-01-05
Share

Yéqinqi mezgillerde izchil xelq'ara axbarat wasitiliridiki qiziq nuqtilardin bolup kelgen béyjing qishliq olimpik musabiqisi Uyghur diyaridiki qirghinchiliq we xongkongdiki démokratiye namayishlirining basturulushi bilen barawer tilgha élinip kelgenidi. Xitay re'isi shi jinpingning 2022-yilliq qishliq olimpik musabiqisi bashlinishqa bir ay qalghanda xébéy ölkisidiki olimpik musabiqisi meydanlirini közdin kechürüshi herqaysi sahening diqqitini qozghidi.

“Blombérg xewerliri”, “Jenubiy xitay seher pochtisi” géziti qatarliqlarning bu heqtiki xewerliride éytilishiche, shi jinping herqaysi orunlardiki musabiqe nuqtilirini közdin kechürgende tenheriketchilerge “Qishliq olimpik musabiqiside yéngi netijilerni qolgha keltürüshinglargha tilekdashmen” dégendek sözlerni qilghan. Emma bu yil 68 yashqa kirgen shi jinping we uninggha hemrah bolghuchilarning hemmisi birdek ötkenki waqitlarning eksiche éghizlirigha qoshlap maska taqiwalghan bolsimu xébéy ölkisining xitaydiki tajsiman wirusi yamrawatqan merkiziy orunlarning biri ikenliki, wirusni kontrol qilishning meghlup boluwatqanliqi dégenler heqqide bir ‍éghizmu söz qilmighan.

Xewerlerde éytilishiche, xitay hökümiti izchil “Wirus nisbitini nölge chüshürüsh” heqqide wezxanliq qiliwatqan bolup, 4-yanwardin bashlap béyjing shehirige 600 kilométirche kélidighan jaydiki yüju shehiri pütünley qamalgha élin'ghan. Shinxu'a agéntliqining bu heqtiki xewiride éytilishiche, bir milyondin köprek nopusi bolghan yüju shehiride üch neper wirus gumandari bayqalghanliqtin bu tedbir élin'ghaniken. Buning bilen yüju shehiri 13 milyonluq nopusqa ige shi'en shehiri qamal qilin'ghandin kéyinki ikkinchi chong sheher bolup qalghan.

Xitaydiki tajsiman wirusidin bashqa xelq'aradiki her sahe pa'aliyetchiliri Uyghurlarning qirghin qilinishi, jaza lagérlirining kéngiyishi qatarliq sewebler tüpeylidin béyjing qishliq olimpik musabiqisini bayqut qilish heqqide türlük pa'aliyetlerni uyushturup kéliwatqanliqi melum. Shuning bilen birge bir qisim gherb döletliri béyjing qishliq olimpik musabiqisini diplomatik bayqut qilidighanliqini élan qilghan bolup, bu, xitay bilen bolghan munasiwetning yirikliship méngiwatqanliqining bir chong ipadisi bolup qalghanidi. Mushundaq türlük ré'alliq aldida xitay hökümitining “Bu qétimqi olimpik musabiqisi bir qétimliq addiy, bixeter we debdebilik musabiqe bolghusi” dégen sho'arni tekrarlishi türlük gumanlarni peyda qilmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet