Җорҗи сорос: “ши җинпиң әркин дуняниң әң хәтәрлик дүшмини”

Мухбиримиз әркин
2019.01.25

Америкилиқ милярдер вә атақлиқ сахавәтчи җорҗи сорос 24‏-январ “дуня иқтисад мунбири” ниң йиғини өткүзүлүватқан шветсарийәниң давус шәһиридә нутуқ сөзләп, хитай рәиси ши җинпиңниң юқири техникилиқ тәқибләш арқилиқ җәмийәтни контрол қилишқа урунуватқан, “әркин дуняниң әң хәтәрлик дүшмини” икәнликини билдүргән.

Җорҗи сорос давуста бу сөзләрни қилған дәл шу күни хитайниң муавин рәиси ваң чишән нутуқ сөзләп, йәршарилишиш, әркин сода вә һәмкарлиқни күчәйтишни тәкитлигән иди

Җорҗи соросниң илгири сүрүшичә, “хитай дунядики бирдинбир истибдат һакимийәт болмисиму, лекин у дунядики әң бай, әң күчлүк вә әң илғар технологийәгә игә дөләт” икән. Венгирийәдә туғулған вә 2‏-дуня урушида натсистлар германийәсиниң җаза лагерлиридин һаят қалған мәзкур сахавәтчи, хитайниң уйғур районидики йиғивелиш лагерлирини тилға алмиған болсиму, әмма униң иқтисади вә технологийә күчи “ши җинпиңни очуқ җәмийәтләрниң әң хәтәрлик рәқибигә айландурғанлиқи” ни билдүргән. Җорҗи соросниң тәкитлишичә, америка президенти трамп хуавей, җоңшиң ширкәтлиридәк хитайнила ойлайдиған карханиларға қаттиқ зәрбә бериши керәк икән.

У агаһландуруп: “әгәр бу ширкәтләр 5‏‏-г техникисиниң базирини игиливалса, у пүтүн дуняға қобул қилғусиз бихәтәрлик тәһдити пәйда қилиду” дегән. Җорҗи соросниң сөзи чәтәл таратқулирида кәң хәвәр қилинди. Униң сөзи хитай ташқи ишлар министирлиқиниң ғәзипини қозғиған. Хитай ташқи ишла министирлиқи баянатчиси хва чүнйиң 25‏-январ күни униң сөзигә инкас қайтуруп, “униң сөзи ақ-қара арилаштуруветилгән мәнисиз баянат. Баһа беришкә әрзимәйду” дегән. Лекин җорҗи сорос бу сөзләрни ғәрб әллиридә хитайниң хуавей, җоңшиң ширкәтлиридәк юқири техникилиқ карханилириға қарита күчлүк гуман пәйда болған бир мәзгилдә қилди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.