Америка әркинлик сарийи: хитай дөләт рәисиниң вәзипә муддитини бикар қилиш лайиһәси үмидимизни суға чилаштурди

Мухбиримиз шөһрәт һошур
2018-02-26
Елхәт
Пикир
Share
Принт

Хитай компартийәсиниң хитай дөләт рәисиниң асаси қанундики вәзипә муддәт чәклимисини бикар қилиш һәққидики тәклип лайиһәсигә қарита америкидики әркинлик сарийи инкас қайтурди.

Әркинлик сарийи бүгүн елан қилған баянатта мундақ дейилди; «дөләт рәисиниң вәзипә муддити чәклимисиниң бикар қилиниши, бизгә, хитайда буниңдин кейин хәлққә қарита бесимниң техиму ашидиғанлиқи, һакимийәтниң диктаторилиқта техиму илгириләйдиғанлиқидин бешарәт бериду».

Бу лайиһиниң хоңкоң вә тәйвәндики демократик һаваға қарита бир шум хәвәр икәнлики әскәртилгән баянатта, хитайниң дуняниң тәртипини өзгәртиш, йәни демократик қаидиләр йоқалған яки аҗизлашқан бир дуня бәрпа қилишқа урунушиниң буниңдин кейин техиму күчийиш вә кеңийиш хәвпи тилға елинди. Әркинлик сарийиниң президенти майкил абромовтиз бу һәқтики баянида: «америка бүгүнгә қәдәр хитай қудрәт тапса, демократик өзгириш тәбиий һалда йүз бериду, дәп қарап вә һәрикәт қилип кәлгән; мәзкур лайиһә бу үмидни пүтүнләй суға чилаштурди».

Америка әркинлик сарийи дунядики демократик тәрәққиятларни көзитиш вә униңға ярдәм бериш мәқситидә қурулған хәлқаралиқ бир тәшкилаттур. 1941-Йили қурулған бу тәшкилат нөвәттә дуняда 2 йерим милярд инсанниң әркинликтин мәһрум яшаватқанлиқи вә өзлириниң улар үчүн хизмәт қилидиғанлиқини илгири сүриду.

Пикирләр (0)
Share
Толуқ бәт