Ши җинпиңниң «баш секретар» дин «император» ға айланмақчи болуши күчлүк диққәт қозғиди

Мухбиримиз әзиз
2018-02-27
Елхәт
Пикир
Share
Принт

Хитай рәиси ши җинпиңниң хитай асасий қанунидики «дөләт рәиси икки нөвәттин артуқ вәзипә өтәшкә болмайду» дегән маддини чиқириветишкә тәйярлиниши һәмдә шу арқилиқ 2023-йилидин кейинму давамлиқ хитайниң рәһбири болушқа интилиши бүгүн пүтүн дунядики ахбарат васитилиридә кәң йәр алди.

Америка вә явропадики һәрқайси чоң гезитләр бирдәк бу әһвални «ши җинпиңниң өз һөкүмранлиқини техиму узақ мәзгилләргә узартиш урунуши хитай 1912-йили хатимә бәргән падишаһлиқ түзүмни әслигә кәлтүрүш урунушиниң һазирқи замандики йеңичә инкаси» деди. Йәнә бәзиләр болса «ши җинпиң мушу усул арқилиқ мав зедоңдин кейинки мутләқ нопузға игә иккинчи даһий болмақчи» дәп баһа бәрди.

Америкидики с н н телевизийәси бу һәқтә мәхсус мақалә елан қилип, «ақ сарай хитай рәиси ши җинпиңниң һоқуқни бу қәдәр зорайтиш урунушиға сүкүттә турмаслиқи лазим. Ундақ болмиғанда бу америкиниң кәлгүси мәнпәәтигә чоң зиян салиду» дәп көрсәтти. «Вашингтон почтиси» гезити болса бу һәқтики мақалисидә ши җинпиңниң мав зедоңни дораш вә «өмүрлүк рәһбәр» болуш урунушиниң зор бир хәтәр икәнликини, болупму хитай хәлқиниң «мутләқ даһий» мав зедоң үчүн 1950- вә 1960-йилларда милйонлап қурбан бәргәнликни алаһидә әсләтти.

Б б с ниң 27-февралдики хәвиридә ейтилишичә, хитайдиму бу һәқтә зор ғулғула болған. Әмма һөкүмәт тармақлири торлардики буниңға мунасивәтлик барчә учурларни өчүрүп ташлиған. Бу һәқтә «хитай яшлири гезити» ниң сабиқ тәһрири ли датоң бейҗиңда б б с ниң телефон зияритини қобул қилған. Зиярәт җәрянида у «асасий қанунни бу шәкилдә өзгәртишкә пүтүн мәмликәт бирдәк қошулидиған иш йоқ. Әмма һазир һәммила киши сүкүттә туруватиду. Биз тарихтин буян икки қәдәм алдиға, бир қәдәм арқиға меңип келиватимиз. Шүбһисизки асасий қанунни мушу йосунда өзгәртиш хитай үчүн балайиапәттин башқа нәрсә болмайду» дегән.

Пикирләр (0)
Share
Толуқ бәт