Ши җинпиңниң тәхттин чүшмәслик пилани зор бир түркүм хитай пуқралирида чәтәлгә көчүп кетиш хияли пәйда қилған

Мухбиримиз шөһрәт һошур
2018-02-28
Елхәт
Пикир
Share
Принт

Фирансийә ахбарат агентлиқиниң хәвәр қилишичә, хитай дөләт рәиси ши җинпиң асаси қанунға түзитиш киргүзүп, вәзипә өтәш муддитини давамлиқ узартиш пилани йәкшәнбә күни ахбаратқа ашкара болғандин кейин зор бир түркүм хитай пуқралирида чәт дөләтләргә, болупму америка билән канадаға көчүп кетиш хияли туғулған.

Хәвәрдә дейилишичә, мәзкур хәвәр тарқалғандин кейинки бир нәччә саәт ичидә хитайчә бәйду учур амбирида көчмәнликкә аит учурларниң көрүлүш қетим санида учқандәк тезликтә өрләш болған. Америка вә канадаға виза ишлирини беҗиришкә һәмкарлишидиған глобә виса намлиқ ширкәтму өзлириниң йеқинқи күнләрдә нормалдин ташқири көп телефон қобул қилғанлиқини баян қилған.

Калифорнийәдә адәттә хитайларға өй сатидиған бир өй-земин ширкитиму ши җинпиңниң тәхттин чүшмәслик пилани ашкариланғандин кейинла хитай көчмәнлириниң өзлириниң иликидики өй-земинға болған қизиқиш нисбитидә пәвқуладдә йүксилиш көрүлгәнликини байқиған. Һәтта хитай муһаҗирлар ишханисиниң бир хадимиму йеқинқи күнләрдин бери өзлиригә адәттикидин көп телефон кәлгәнликини ашкарилиған.

Анализчилар, ши җинпиңниң диктаторилиқ чүшиниң көп сандики хитай пуқралирида хитай йеқин кәлгүсидә сиясий җәһәттә мав зедоң дәвригә қайтиши мумкин, дегән әндишини туғдурғанлиқини, шу сәвәбтин бир қисим мүлүкдар пуқраларниң хитайдин қечиш койиға чүшкәнликини пәрәз қилишмақта.

Пикирләр (0)
Share
Толуқ бәт