Чәтәлдики хитай оқуғучилири ши җинпиңниң мәңгү һоқуқ тутушиға қарши туруш һәрикити башлиди

Мухбиримиз әркин
2018-03-09
Елхәт
Пикир
Share
Принт

Чәтәлләрдики хитай оқуғучилар арисида хитай асасий қанунини өзгәртип, ши җинпиңниң мәңгү һоқуқ тутушиға йол ечишқа қарши туруш һәрикити қозғалди.

Хитай хәлқ қурултийиниң мәмликәтлик йиғини йәкшәнбә күни аваз берип, хитай асаси қануниниң 79‏-маддисидики дөләт рәисиниң 2 нөвәт һоқуқ тутушиға даир чәклимини бикар қилишни қарар қилидикән. Чәтәл ахбаратлири билән көзәткүчиләр, хитай компартийәсиниң бу чәклимини бикар қилиши ши җинпиңниң мәңгү һоқуқ тутушиға йол ечип беришни мәқсәт қилғанлиқини билдүрмәктә.

Америкидики «ташқи сиясәт» журнилиниң хәвәр қилишичә, йеқинда америкиниң калифорнийә университетида хитай оқуғучилириниң хитай асасий қанунини өзгәртишкә қарши туруш тәшкилати қурулуп, рәсмий тәшвиқат башлиған. Хәвәрдә бу тәшвиқат еланлириниң калифорнийә университетидин башқа ню-йорктики йорк университети қатарлиқ мәктәпләргичә кеңәйгәнликини билдүргән.

Хитай компартийәсиниң хитай асаси қанунидики чәклимини бикар қилиш қарари хәлқарада зор ғулғула қозғап, кишилик һоқуқ тәшкилатлирида «бу хитайниң бир адәм диктатурлиқидики истибдат дөләткә айлинишиниң йолини ачиду,» дегән әндишә пәйда қилған иди.

Фирансийә агентлиқиниң җүмә күни бәргән хәвиридә тәкитлишичә, һазир көзәткүчиләрниң диққити хитай хәлқ қурултийи вәкиллириниң йәкшәнбә күни беридиған авазиға буралған. Хитай хәлқ қурултийиниң 54 йиллиқ тарихида һечқачан компартийә оттуриға қойған бирәр қанун лайиһәси рәт қилинип бақмиған икән. Фирансийә агентлиқиниң хәвиридә мәзкур лайиһәниң рәт қилинишини күтүшкә болмисиму, бирақ бәзи вәкилләрниң рәт авази беришиниң мумкинлики билдүрүлгән. «Ташқи сиясәт» журнилиниң хәвиридә баян қилишичә, асасий қанундики чәклимини бикар қилишқа қарши туруватқан оқуғучилар, «ши җинпиңни хитай хәлқи биләт ташлап сайлимиғанлиқи, униң мәңгүлүк һоқуқ тутуши бир кишиниң шәхси диктаторлиқини пәйда қилидиғанлиқи» ни илгири сүргән.

Пикирләр (0)
Share
Толуқ бәт