Chet'eldiki xitay oqughuchiliri shi jinpingning menggü hoquq tutushigha qarshi turush herikiti bashlidi

Muxbirimiz erkin
2018-03-09
Élxet
Pikir
Share
Print

Chet'ellerdiki xitay oqughuchilar arisida xitay asasiy qanunini özgertip, shi jinpingning menggü hoquq tutushigha yol échishqa qarshi turush herikiti qozghaldi.

Xitay xelq qurultiyining memliketlik yighini yekshenbe küni awaz bérip, xitay asasi qanunining 79‏-maddisidiki dölet re'isining 2 nöwet hoquq tutushigha da'ir cheklimini bikar qilishni qarar qilidiken. Chet'el axbaratliri bilen közetküchiler, xitay kompartiyesining bu cheklimini bikar qilishi shi jinpingning menggü hoquq tutushigha yol échip bérishni meqset qilghanliqini bildürmekte.

Amérikidiki "Tashqi siyaset" zhurnilining xewer qilishiche, yéqinda amérikining kaliforniye uniwérsitétida xitay oqughuchilirining xitay asasiy qanunini özgertishke qarshi turush teshkilati qurulup, resmiy teshwiqat bashlighan. Xewerde bu teshwiqat élanlirining kaliforniye uniwérsitétidin bashqa nyu-yorktiki york uniwérsitéti qatarliq mekteplergiche kéngeygenlikini bildürgen.

Xitay kompartiyesining xitay asasi qanunidiki cheklimini bikar qilish qarari xelq'arada zor ghulghula qozghap, kishilik hoquq teshkilatlirida "Bu xitayning bir adem diktaturliqidiki istibdat döletke aylinishining yolini achidu," dégen endishe peyda qilghan idi.

Firansiye agéntliqining jüme küni bergen xewiride tekitlishiche, hazir közetküchilerning diqqiti xitay xelq qurultiyi wekillirining yekshenbe küni béridighan awazigha buralghan. Xitay xelq qurultiyining 54 yilliq tarixida héchqachan kompartiye otturigha qoyghan birer qanun layihesi ret qilinip baqmighan iken. Firansiye agéntliqining xewiride mezkur layihening ret qilinishini kütüshke bolmisimu, biraq bezi wekillerning ret awazi bérishining mumkinliki bildürülgen. "Tashqi siyaset" zhurnilining xewiride bayan qilishiche, asasiy qanundiki cheklimini bikar qilishqa qarshi turuwatqan oqughuchilar, "Shi jinpingni xitay xelqi bilet tashlap saylimighanliqi, uning menggülük hoquq tutushi bir kishining shexsi diktatorliqini peyda qilidighanliqi" ni ilgiri sürgen.

Toluq bet