Уйғур диярида “ши җинпиңниң сөзини өгиниш долқуни” көтүрүлди

Мухбиримиз әзиз
2022.07.19
Share on WhatsApp
Share on WhatsApp

Хитай рәиси ши җинпиңниң 13-июлда уйғур диярида зиярәттә болушидин кейин уйғур дияриниң һәрқайси шәһәр вә наһийәлиридин тартип йеза-қишлақлириғичә һәммила җайда тушмутуштин “рәис ши җинпиңниң сөзини яхши өгинип парлақ кәлгүси яритиш” зор долқуни көтүрүлгән.

Хитай һөкүмтии башқурушидики “хитай хәвәрлири” ториниң 19-июлдики хәвиридә ейтилишичә, кәлпин наһийәсиниң гәзлик йезисидики “үч әл” (әл райини билиш, әлгә нәп йәткүзүш, әлни майил қилиш) хизмитигә чүшкән кадирлар шу җайдики кадирлар вә деһқанларни йеза мәркизигә топлап, ши җинпиң һәққидики телевизийә хәвәрлирини қоюп бәргән. Йопурға наһийәсидики паалийәттә һәрқайси аһалиләр комитетиниң кадирлири өз тәвәликидики кишиләрни “үлгилик аилә” ләргә топлап ши җинпиңниң зиярити һәққидики тәшвиқат филимлирини көргән. Бу хил паалийәтләргә қатнашқан кишиләрдин қәшқәр йеңишәһәр наһийәсиниң бағчә йезисидики деһқанлардин бухәлчәм турсун “баш секретарниң аддий пуқраларниң өйлиригә кирип әһвал сориғанлиқини көрүп бәк тәсирләндим. Шинҗаңдики һәр милләт хәлқиниң җуңхуа бүйүк аилисиниң бир әзаси икәнликидин пәхирләндим” дегән.

Бу хилдики йүзлигән аммини залларға топлап өй вә шханиларға қәдәр омумлаштурулған ши җинпиңниң зиярити вә униң сөзлигән сөзлири һәққидики тәсират сөзләш паалийәтлирдә “үч әл” кадирлири асаслиқ тәшкиллигүчиләр болған. Бу җәрянда нуқтилиқ һалда ши җинпиңниң “җуңхуа ортақ кимлики чүшәнчисини чоңқурлаштуруш”, “асасий қатлам партийә тәшкилатлириниң җәңгивар ролини җари қилдуруш”, “шинҗаңни мәдәнийәт арқилиқ суғириш” дегәндәк бир қатар мәзмунлар қайтидин мәркизий темилар қатарида өгиниш билән биргә ши җинпиңниң “алий даһий” лиқ нопузи йәнә бир қетим күчлүк тәшвиқ қилинған.

Хитай һөкүмитиниң бу хилдики “мәдәнийәт зор инқилаби” услубида сиясий тәшвиқатни кеңәйтиши һәққидә уйғуршунас алимлардин профессор җеймис милвард (James Millward) өзиниң тиветтер бетидә мәхсус сәһипә аҗритип “ши җинпиңниң бу қетимқи зиярәт җәрянида сөзлириниң мәркизий идийәси бизгә ‛шинҗаңдики һәммә милләт хитай миллитидур, улар җәзмән хитай болуп тәрәққий қилиш керәк‚ дегән бир учурни йоллайду” дәп язған.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.