Ши җинпиң хитай иқтисади "давалғуш дәври" гә кирди, дегән

Мухбиримиз ирадә
2020-08-27
Share

Хитай дөләт рәиси ши җинпиң йеқинда чақирған бир йиғинида хитай иқтисадиниң "давалғуш дәври" гә киргәнликини, шундақла хитайниң хәлқара муһитта йеңи зиддийәт вә йеңи хирисларға дуч келиватқанлиқини билдүргән.

Ройтерсниң бу һәқтики хәвиридә ейтилишичә, у юқиридики сөзләрни 24-авғуст күни җуңнәнхәйдә хитайниң иқтисад вә җәмийәт саһәсидики бир қисим мутәхәссисләр билән "14-бәш йиллиқ пилан" ни музакирә қилғанда қилған. У йиғин җәрянида хитай иқтисадиниң "давалғуш басқучи" ға қәдәм қойғанлиқини әскәртип "хитай чоқум давалғуш дәвригә тәйярлиқ қилиши керәк, чүнки таҗсиман вирус юқуми содидики қоруқчилиқни тезлитивәтти, дуня иқтисадини бузуп, тәминләш зәнҗирлирини қалаймиқанлаштурди. Биз кәлгүси бир мәзгилдә, ташқи муһитта барғансери көп қарши шамалларға дуч келимиз, биз чоқум бир қатар йеңи хәтәр вә хирисларға тақабил турушқа тәйярлиқ қилишимиз керәк" дәп тәкитлигән.

Йеқинда "CNBC" намлиқ хәвәр тори хитай иқтисадиниң һазир хитайдики нопусниң қериши, чоң хәлқаралиқ ширкәтләрниң шәрқий җәнубий асиядики дөләтләргә йөткилиши вә америка билән болған ихтилапи қатарлиқ бир қатар амиллар сәвәбидин зор риқабәткә дуч келиватқанлиқини хәвәр қилғаниди.

Мәлум болушичә, ши җинпиң бу йиғинда америка билән болған сода ихтилапини биваситә тилға алмиған болмисиму бирақ "биз чоқум биз билән һәмкарлишишни халайдиған барлиқ дөләтләр, районлар вә карханилар, җүмлидин америкадики һәрқайси шитатлар, йәрликләр вә карханилар билән актип һәмкарлишишимиз керәк" дейиш арқилиқ өзигә чекиниш йоли әп қойған.

Америкадики ахбаратларниң хәвәр қилишичә, таҗсиман вирус юқуми вә шундақла америка билән болған зиддийәтләр түпәйли кәп чиққан иқтисадий муқимсизлиқ ши җинпиң рәһбәрликигә қарши иҗтимаий наразилиқларни күчәйткән болуп, ши җинпиң һазир һәм ички һәм ташқи җәһәттә күчлүк бесимға дуч кәлмәктикән.

Америка һөкүмити хитайниң уйғурларға қаратқан зулумини қаттиқ тәнқид қилип, бу зулумға ортақ болуватқан нурғун муһим хитай ширкәтлири вә дөләт муәссәлиригә җаза тәдбири қойғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт