Shi jinping xitay iqtisadi "Dawalghush dewri" ge kirdi, dégen

Muxbirimiz irade
2020-08-27
Share

Xitay dölet re'isi shi jinping yéqinda chaqirghan bir yighinida xitay iqtisadining "Dawalghush dewri" ge kirgenlikini, shundaqla xitayning xelq'ara muhitta yéngi ziddiyet we yéngi xirislargha duch kéliwatqanliqini bildürgen.

Roytérsning bu heqtiki xewiride éytilishiche, u yuqiridiki sözlerni 24-awghust küni jungnenxeyde xitayning iqtisad we jem'iyet sahesidiki bir qisim mutexessisler bilen "14-Besh yilliq pilan" ni muzakire qilghanda qilghan. U yighin jeryanida xitay iqtisadining "Dawalghush basquchi" gha qedem qoyghanliqini eskertip "Xitay choqum dawalghush dewrige teyyarliq qilishi kérek, chünki tajsiman wirus yuqumi sodidiki qoruqchiliqni tézlitiwetti, dunya iqtisadini buzup, teminlesh zenjirlirini qalaymiqanlashturdi. Biz kelgüsi bir mezgilde, tashqi muhitta barghanséri köp qarshi shamallargha duch kélimiz, biz choqum bir qatar yéngi xeter we xirislargha taqabil turushqa teyyarliq qilishimiz kérek" dep tekitligen.

Yéqinda "CNBC" namliq xewer tori xitay iqtisadining hazir xitaydiki nopusning qérishi, chong xelq'araliq shirketlerning sherqiy jenubiy asiyadiki döletlerge yötkilishi we amérika bilen bolghan ixtilapi qatarliq bir qatar amillar sewebidin zor riqabetke duch kéliwatqanliqini xewer qilghanidi.

Melum bolushiche, shi jinping bu yighinda amérika bilen bolghan soda ixtilapini biwasite tilgha almighan bolmisimu biraq "Biz choqum biz bilen hemkarlishishni xalaydighan barliq döletler, rayonlar we karxanilar, jümlidin amérikadiki herqaysi shitatlar, yerlikler we karxanilar bilen aktip hemkarlishishimiz kérek" déyish arqiliq özige chékinish yoli ep qoyghan.

Amérikadiki axbaratlarning xewer qilishiche, tajsiman wirus yuqumi we shundaqla amérika bilen bolghan ziddiyetler tüpeyli kep chiqqan iqtisadiy muqimsizliq shi jinping rehberlikige qarshi ijtima'iy naraziliqlarni kücheytken bolup, shi jinping hazir hem ichki hem tashqi jehette küchlük bésimgha duch kelmektiken.

Amérika hökümiti xitayning Uyghurlargha qaratqan zulumini qattiq tenqid qilip, bu zulumgha ortaq boluwatqan nurghun muhim xitay shirketliri we dölet mu'esselirige jaza tedbiri qoyghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet