Ши җинпиңни илаһлаштуруш долқуни башланғуч мәктәпләргә кеңәймәктә

Мухбиримиз әзиз
2018-09-04
Елхәт
Пикир
Share
Принт

Уйғурлар дияридики сиясий контроллуқниң бир мәзмуни сүпитидә хитай рәиси ши җинпиңни илаһлаштуруш долқуниниң башланғуч вә оттура мәктәпләргичә кеңийиватқанлиқи диққәт қозғимақта. «Үрүмчи кәчлик гезити» ниң 4-сентәбирдики хәвиридә буниң қисмән тәпсилати баян қилиниду.

Хәвәрдә ейтилишичә, 4-сентәбир күни уйғурлар дияридики маарип системисида биртуташ оқуш башланған болуп, мәктәпкә йиғилған оқуғучилар тунҗи оқуш күнини «вәтәнгә җаваб қайтурушқа ирадә тикләш» һәққидики өгиниш билән башлиған. Үрүмчи шәһәрлик 42-башланғуч мәктәптә оқуғучилар байрақ чиқириш мурасимиға қатнашқандин кейин оқутқучиларниң йетәкчиликидә ши җинпиңниң «яш вақитлирида бир йәшик китаб елип йезиға чүшкәнлики, етизлиқта әмгәк қилиш җәрянида луғәт ишләткәнлики, һәр 30 чақиримда бирдин китаб арийәт берип маңғанлиқи» дегәндәк һекайиләрни аңлиған. Оқуғучилар бу һәқтә пикир қилип: «ши бовам мениң өгиниш үлгәм» дәп қарайдиғанлиқини билдүргән.

Германийәдә яшайдиған, илгири маарип саһәсидә узун йиллар хизмәт қилған мунәввәр ханим өсмүрләргә қаритилған бу хил тәрбийә һәрикитиниң тамамән меңә ююш икәнлики, мәктәп балилириға қаритилған мундақ тәрбийәниң хитай коммунист диктатори мав зедуң дәвридиму мәвҗут болғанлиқи, һазир шималий корейәдиму күчлүк давамлишиватқанлиқини әскәртип: : «гөдәкләргә тунҗи оқуш күнидила хитай рәисини өзигә үлгә қилиш һәққидә тәрбийә бериш мәлум мәнидин алғанда шималий корейәдики сабиқ диктатор ким җоңелниң ‹илаһи' нопузини башланғуч мәктәп оқуғучилириға тәшвиқ қилғиниға охшайдиған сиясий меңә ююш һәрикитидур» деди.

Йеқинда мухбиримизниң әһвал игилиши җәрянида уйғурлар дияридики һәрқайси аилиләргә ши җинпиңниң рәсимини есиш һәққидә уқтуруш тарқитилғанлиқи, буниң һазир пүткүл район тәвәсидә омумлишиватқанлиқи мәлум болған иди.

Пикирләр (0)
Share
Толуқ бәт