Уйғур районида ши җинпиңниң "шинҗаңға даир йолйоруқлири" ни қәтий һимайә қилиш тәкитләнмәктә

Мухбиримиз ирадә
2020-10-01
Share

Хитай дөләт рәиси ши җинпиң йеқинда бейҗиңда чақирилған "шинҗаң хизмити йиғини" да уйғур елидә йүргүзүлүватқан сиясәтләрниң тоғрилиқини илгири сүрүп, уни изчил давамлаштуруш һәққидә сөз қилған иди. Нөвәттә уйғур елидики даириләр ши җинпиңниң сөзини қәтий әмәлийләштүрүш һәққидә бәс-бәстә ипадә билдүрмәктә.

1-Өктәбир күни хитайчә "шинҗаң гезити" дә ши җинпиңниң йолйоруқини тәтқиқ қилиш вә хитай компартийәсиниң мәркәзләшкән вә бирликкә кәлгән рәһбәрликини күчәйтиш һәққидә бир парчә обзор елан қилинди.

Обзорда ши җинпиңниң бейҗиңда сөзлигән нутқида "һәр дәриҗилик партийә комитетлиридин партийәниң йеңи дәврдики шинҗаңни идарә қилиш истратегийәсигә маслишишни, партийә мәркизи комитети билән идийә вә һәрикәттә бирдәкликни сақлап, партийәниң шинҗаңға болған рәһбәрликини күчәйтиштә чиң туруш" ни тәләп қилғанлиқи әскәртилгән.

Обзорда мундақ дейилгән: "әмәлийәт шуни испатлидики, шинҗаңдики хизмәтләрни ишләшниң ачқучи партийәдә. . . Партийәниң шинҗаңниң хизмитигә болған рәһбәрликини күчәйтиш үчүн биз чоқум кадирлар қошунини күчәйтишимиз керәк. Әмәлий иқтидарға игә кадирлар қошунини йетиштүрүшкә әһмийәт бериш керәк"

Обзорда уйғур елидә мәңгүлүк әминликтин ибарәт баш нишанға йетиш үчүн барлиқ өлкиләр бирдәк һәмкарлишишқа, барлиқ саһәләр йолйоруққа қәтий маслишишқа чақирилған.

Хитай һөкүмитиниң уйғур елидики лагер системиси вә ассимилятсийә сиясәтлирини ишқа ашурушта һәл қилғуч рол ойнаватқан биңтуән даирилириму 30-сентәбир күни партийә мәркизий комитетиниң қарари вә орунлаштурулушлириниң биңтуәндә толуқ әмәлийлишишигә капаләтлик қилиш һәққидә мәхсус йиғин чақирип, хитай һөкүмитиниң биңтуәнгә бериватқан йүксәк әһмийитини вә бурчини толуқ тонуп йетишни вә партийәниң йолйоруқлирини қәтий иҗра қилидиғанлиқини билдүргән.

Хитай һөкүмитиниң уйғур елидә йолға қоюватқан сиясәтлири хәлқарада зор тәнқидкә учраватқан вә зулумға иштирак қилған хитай әмәлдарлири вә муәсссәлири америка тәрипидин җазалиниватқан бир пәйттә ши җинпиңниң бундақ бир чақириқ билән оттуриға чиқиши униң уйғурларни ассимилятсийә қилиш сияситини җаһиллиқ билән давам қилидиғанлиқиниң намайәндиси, дәп баһаланмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт