Uyghur rayonida shi jinpingning "Shinjanggha da'ir yolyoruqliri" ni qet'iy himaye qilish tekitlenmekte

Muxbirimiz irade
2020-10-01
Élxet
Pikir
Share
Print

Xitay dölet re'isi shi jinping yéqinda béyjingda chaqirilghan "Shinjang xizmiti yighini" da Uyghur élide yürgüzülüwatqan siyasetlerning toghriliqini ilgiri sürüp, uni izchil dawamlashturush heqqide söz qilghan idi. Nöwette Uyghur élidiki da'iriler shi jinpingning sözini qet'iy emeliyleshtürüsh heqqide bes-beste ipade bildürmekte.

1-Öktebir küni xitayche "Shinjang géziti" de shi jinpingning yolyoruqini tetqiq qilish we xitay kompartiyesining merkezleshken we birlikke kelgen rehberlikini kücheytish heqqide bir parche obzor élan qilindi.

Obzorda shi jinpingning béyjingda sözligen nutqida "Her derijilik partiye komitétliridin partiyening yéngi dewrdiki shinjangni idare qilish istratégiyesige maslishishni, partiye merkizi komitéti bilen idiye we herikette birdeklikni saqlap, partiyening shinjanggha bolghan rehberlikini kücheytishte ching turush" ni telep qilghanliqi eskertilgen.

Obzorda mundaq déyilgen: "Emeliyet shuni ispatlidiki, shinjangdiki xizmetlerni ishleshning achquchi partiyede. . . Partiyening shinjangning xizmitige bolghan rehberlikini kücheytish üchün biz choqum kadirlar qoshunini kücheytishimiz kérek. Emeliy iqtidargha ige kadirlar qoshunini yétishtürüshke ehmiyet bérish kérek"

Obzorda Uyghur élide menggülük eminliktin ibaret bash nishan'gha yétish üchün barliq ölkiler birdek hemkarlishishqa, barliq saheler yolyoruqqa qet'iy maslishishqa chaqirilghan.

Xitay hökümitining Uyghur élidiki lagér sistémisi we assimilyatsiye siyasetlirini ishqa ashurushta hel qilghuch rol oynawatqan bingtu'en da'irilirimu 30-séntebir küni partiye merkiziy komitétining qarari we orunlashturulushlirining bingtu'ende toluq emeliylishishige kapaletlik qilish heqqide mexsus yighin chaqirip, xitay hökümitining bingtu'en'ge bériwatqan yüksek ehmiyitini we burchini toluq tonup yétishni we partiyening yolyoruqlirini qet'iy ijra qilidighanliqini bildürgen.

Xitay hökümitining Uyghur élide yolgha qoyuwatqan siyasetliri xelq'arada zor tenqidke uchrawatqan we zulumgha ishtirak qilghan xitay emeldarliri we mu'essseliri amérika teripidin jazaliniwatqan bir peytte shi jinpingning bundaq bir chaqiriq bilen otturigha chiqishi uning Uyghurlarni assimilyatsiye qilish siyasitini jahilliq bilen dawam qilidighanliqining namayendisi, dep bahalanmaqta.

Toluq bet