Shi jinping qaytidin pütün hoquqni öz qoligha aldi

Muxbirimiz ümidwar
2018-03-18
Élxet
Pikir
Share
Print

17-Mart küni xitay xelq qurultiyi yighinining xulasisi süpitide xitay xelq jumhuriyitining re'is we mu'awin re'islirini saylash ötküzülüp, xelq qurultiyining 2970 neper ezasi shi jinpingning dölet re'isi we herbiy ishlar komitétining re'islikige awaz bergen. Qiziq nuqta shuki, birmu qarshi awaz bolmighan, xitay mu'awin dölet re'islik ornigha xitay kompartiyisi 19-qurultiyida merkizi komitét siyasiy byuro da'imiy ezaliqidin qalghan wang chishen érishken bolup, uninggha peqetla birla qarshi awaz bérilgen.

Analizchilarning qarishiche, bu saylam dunyadiki kemdin-kem körülidighan peqet birla namzat bolush, hemmila adem shu namzatqa awaz bérish tüzümidiki saylam bolghan. En'gliye b b s agéntliqining xewer qilishiche, dölet re'islik we mu'awin re'islik ornigha shi jinping we wang chishendin bashqa ikkinchi bir namzat bolmighan. 

Radiyomiz xitay bölümining xewer qilishiche, shi jinping xitay dölet re'isliri ichide tunji qétim asasiy qanunni tutup, qesem bérip wezipe tapshuruwalghan re'is iken. Xitayda 2014-yili, asasiy qanun'gha qesem bérish tüzümi yolgha qoyulghan idi.

Shi jinping xitay asasiy qanunigha qolini qoyup turup, özining xitay xelq jumhuriyiti asasiy qanunigha sadiq bolidighanliqi we bashqa qesem sözlirini éytqan bolsimu, lékin uning qesem sözide "Partiyege sadiq bolimen" dégen jümlining yoqluqi diqqet qozghighan.

Shi jinping bu qétim partiyining bash sékrétari, dölet re'isi, herbiy ishlarning re'islikidin ibaret üch aliy hoquqni öz qoligha kirgüzgen. Shuningdek xitay asasiy qanunidiki dölet re'is we mu'awin re'isining wezipe ötesh möhlitimu élip tashlan'ghan idi.

Toluq bet