Yash ijtima'iy pen xadimlirining kallisini "Shi jinping idiyisi bilen qorallandurush" telep qilindi

Muxbirimiz ümidwar
2017-12-17
Élxet
Pikir
Share
Print

Xitay kommunist da'iriliri Uyghur diyaridiki yash ijtima'iy pen tetqiqatchilirining "Kallisini shi jinping idiyisi bilen qorallandurup", Uyghur rayonini idare qilishtiki "Küchlük siyasiy kapaletchi we eqli qollighuchi bolushi" ni telep qildi.

Chén chüen'go bashchiliqidiki Uyghur aptonom rayonluq kommunistik partiye da'imiy komitéti we teshwiqat bölümi 16-dékabir küni ürümchidiki shinjang uniwérsitétida achqan yash ijtima'iy pen tetqiqatchiliri munbiri pa'aliyitide bu telepni tekitligen.

Tengritagh torining xewiridin melum bolushiche, yighin birdek halda her millet yash ijtima'iy pen xadimlirini "Shinjangning ijtima'iy muqimliqi we ebediy eminlikini emelge ashurushtin ibaret bash nishandiki küchlük küch bolush" qa chaqirghan.

Yighinda 280 parche maqale oqulghan bolup, gerche bu maqalilerning kespi we mezmun da'irisi axbaratqa ayding bolmisimu, emma bu xildiki yighinlardin xewerdar bir Uyghur ijtima'iy pen tetqiqatchisining éytishiche, mutleq köp qisim maqalilerning muqimliqni qoghdash, idé'ologiye sahesidiki bölgünchilikke zerbe bérish we shi jinping idiyisi teshwiqati témisi qatarliqlargha merkezleshkenliki roshen.

Chén chüen'go Uyghur aptonom rayoni partkom sékrétarliq wezipisige teyinlen'gendin buyan, Uyghur diyarida "Muqimliqni qoghdash", "Ikki yüzlimichilikke zerbe bérish" namidiki siyasiy heriketlerni kücheytken bolup, buning ichide idé'ologiye sahesining eng muhim zerbe bérish sahesi bolghanliqi inkaslar we xewerlerdin melum bolmaqta. Xitay da'iriliri Uyghur diyari tarixi, medeniyiti, Uyghur edebiyati, ijtima'iy-iqtisadiy tereqqiyati tarixi mesililirige qarita sénzorni kücheytip, ilgiri neshr qilinip tarqitilghan bir qisim tarixi eslimiler, romanlar we bashqilarni yighiwélish, qur'an we bashqa dini mezmundiki kitablarni yighish hem chek qoyush pa'aliyetliri élip barghan. 

Amérikidiki mezkur Uyghur ziyaliysining éytishiche, ijtima'iy pen we edebiyat sen'et sahesidiki bir qisim tonulghan Uyghur ziyaliyliri, edibliri, sha'irliri, sen'etkarliri, mesilen dangliq naxshichi abduréhim héyt we bashqilar nazaret hem qamaqqa élin'ghan. Melum bolushiche, nöwette xitay da'iriliri yene Uyghurlar arisidiki atalmish kona teshwiqat - "Pantürkizm we pan islamizm" gha qarshi küresh qilishni qaytidin kücheytmekte iken.

Toluq bet