Шималий корейәниң ядро пиланиға ярдәм бәргән хитай вә русийә ширкәтлири җазаланди

Мухбиримиз әзиз
2017.08.22

Шималий корейә вәзийитиниң җиддийлишишигә әгишип, америка һөкүмити иҗра қилишқа киришкән ембарго сиясити шималий корейәниң ядро қораллирини тәрәққий қилдурушиға биваситә яки васитилик ярдәм бәргән бир қисим хитай вә русийә ширкәтлиригиму тегишлик чарә көрди.

Бирләшмә агентлиқниң хәвиригә қариғанда, америка һөкүмити җаза бәргән бу ширкәтләр вә шәхсләр йәр асти байлиқлири һәмдә пул-муамилә ишлири билән шуғуллинидиғанлар болуп, улар шималий корейәниң ядро қораллириға даир хизмитигә ярдәмдә болған икән. Америка малийә министирлиқиниң баян қилишичә, хитайдики дәндуң, җинхуң қатарлиқ үч чоң ширкәт шималий корейәдин 500 милйон долларлиқ көмүр импорт қилған.

Дәндуң ширкитиниң мудири чи йүпиң болса шималий корейәгә нәқ пул йөткигән. Ройтерисниң хәвиридә ейтилишичә, йәнә русийәниң үч сода ширкити шималий корейә үчүн сингапорни база қилип, йеқилғу содиси билән мәшғул болған болуп, уларму охшаш болмиған җазаға учриған.

Малийә министирлиқиниң министири стевин бу һәқтә сөз қилип “малийә министирлиқи шималий корейәни қоллиғанларға давамлиқ бесим ишлитиду, шундақла уларни америка малийә системисидин сиқип чиқириду” дегән. Бүгүн американиң әдлийә министирлиқи хитай вә русийә ширкәтлиридин иккисиниң 11 милйон долларлиқ мәблиғини мусадирә қилған һәмдә һәрқандақ ширкәт яки шәхсниң шималий корейәниң ядро қораллири ишлириға һәрқандақ шәкилдә ярдәм беришигә болмайдиғанлиқини тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.