Шималий корейә мәсилисидә хитай һөкүмити пассип орунға чүшүп қелиш алдида турмақта

Мухбиримиз әзиз
2018-04-23
Share

Дуня ахбаратида қиззиқ темилардин болуватқан шималий корейә һөкүмдари, диктатор ким җоңунниң җәнубий корейә вә америка рәһбәрлири билән сөһбәттә болмақчи болуши һәққидики хәвәрләрдә хитайниң барғансери пассип орунға чүшүп қеливатқанлиқи мәлум болмақта.

“нюйорк вақти” гезитигә 23-апрел бесилған бу һәқтики мақалида көрситилишичә, шималий корейәниң бу қетимқи сөһбәттин кейин җәнубий корейә билән йеқинлишиши һәмдә хитай билән болған мәнпәәт мунасивитиниң йирақлишиши мөлчәрләнмәктә икән. Шуниң билән биргә шималий корейәниң ядро қораллар системисидин ваз кечишни халишиға әгишип, хитайниң шималий корейә үчүн муһимлиқи техиму аҗизлайдикән.

Болупму нөвәттә шималий корейәниң җәнубий корейә вә америка рәһбәрлири билән болған учришишқа даир ишларни өз алдиға сәрәмҗанлаштуруши хитайни бирдинла бу җайдики сиясий шаһмат тахтисида йетим орунға чүшүрүп қойған. Хоңкоң университетиниң профессори җаң бавхуй бу һәқтә тохтилип, “хитайниң шималий корейәдики мөтивәрлик орниниң бикар болушқа йүзлиниши хитай үчүн еғир кәлмәктә,” дегән. 

Нөвәттики вәзийәттә америка һөкүмити шималий корейә билән болған сөһбәткә алдиримайдиғанлиқини билдүргән, җәнубий корейә болса икки корийәни бирликкә кәлтүрүшкә алдиримақта икән. Хитай болса икки корейә бирликкә келип, бу йеңи дөләтниң америкиға еғип кетишидин бәкму әнсиримәктә икән. Шуниң билән биргә шималий корейә һөкүмити җәнубий корейәдә даимий турушлуқ 28 миң америка армийисини чекиндүрүп кетиш тәлипидин ваз кечидиғанлиқини билдүргән болғачқа, бу әһвал хитай үчүн техиму еғир баш ағриқи болуп қалидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт