Shimaliy koréye mesiliside xitay hökümiti passip orun'gha chüshüp qélish aldida turmaqta

Muxbirimiz eziz
2018.04.23
Share on WhatsApp
Share on WhatsApp

Dunya axbaratida qizziq témilardin boluwatqan shimaliy koréye hökümdari, diktator kim jong'unning jenubiy koréye we amérika rehberliri bilen söhbette bolmaqchi bolushi heqqidiki xewerlerde xitayning barghanséri passip orun'gha chüshüp qéliwatqanliqi melum bolmaqta.

“Nyuyork waqti” gézitige 23-aprél bésilghan bu heqtiki maqalida körsitilishiche, shimaliy koréyening bu qétimqi söhbettin kéyin jenubiy koréye bilen yéqinlishishi hemde xitay bilen bolghan menpe'et munasiwitining yiraqlishishi mölcherlenmekte iken. Shuning bilen birge shimaliy koréyening yadro qorallar sistémisidin waz kéchishni xalishigha egiship, xitayning shimaliy koréye üchün muhimliqi téximu ajizlaydiken.

Bolupmu nöwette shimaliy koréyening jenubiy koréye we amérika rehberliri bilen bolghan uchrishishqa da'ir ishlarni öz aldigha seremjanlashturushi xitayni birdinla bu jaydiki siyasiy shahmat taxtisida yétim orun'gha chüshürüp qoyghan. Xongkong uniwérsitétining proféssori jang bawxuy bu heqte toxtilip, “Xitayning shimaliy koréyediki mötiwerlik ornining bikar bolushqa yüzlinishi xitay üchün éghir kelmekte,” dégen. 

Nöwettiki weziyette amérika hökümiti shimaliy koréye bilen bolghan söhbetke aldirimaydighanliqini bildürgen, jenubiy koréye bolsa ikki koriyeni birlikke keltürüshke aldirimaqta iken. Xitay bolsa ikki koréye birlikke kélip, bu yéngi döletning amérikigha éghip kétishidin bekmu ensirimekte iken. Shuning bilen birge shimaliy koréye hökümiti jenubiy koréyede da'imiy turushluq 28 ming amérika armiyisini chékindürüp kétish telipidin waz kéchidighanliqini bildürgen bolghachqa, bu ehwal xitay üchün téximu éghir bash aghriqi bolup qalidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet