Шималий корейә вә хитай ахбаратлири “сөз уруши” қилмақта

Мухбиримиз ирадә
2017.05.04
Share on WhatsApp
Share on WhatsApp

Хитайниң һөкүмәт авази дәп қарилидиған хәлқ күндилик гезити вә йәр шари вақти гезитлири өткән күнләрдики баш мақалилиридә шималий корейәниң ядро синақлирини тәнқид қилип, уни хитайға тәһдит дәп көрсәткәндин кейин, шималий корейәниң хәвәр агентлиқиму буниңға инкас қайтуруп, хитайға тәһдит салған.

Фирансийә агентлиқиниң хәвиридин қариғанда, шималий корейә хәвәр агентлиқи KCNA өз хәвиридә, хитайни “америкиниң депиға усул ойнаватиду” дәп әйиблигәндин башқа йәнә, уни тәһдит қилип “хитай әгәр шималий корейәниң сәврини ташурувәтсә, буниң ақивити интайин еғир болиду” дегән.

Фирансийә агентлиқиниң ейтишичә, шималий корейә ахбаратлири күндә дегүдәк америка, японийә вә җәнубий корейәни тиллап туридикән. Бирақ, униң хитайни очуқ тилға елип бундақ тәһдит селиши интайин аз учрайдиған әһвал болғачқа, пәйшәнбә күни хитай буниңға дәрһал инкас қайтуруп “бизниң шималий корейә билән яхши қошна болуп өткүмиз бар” дегән. Хитай ташқи ишлар министири гең шуаң сөзидә “хитайниң шималий корейә билән достанә вә йеқин қошна болуп өтүш нийити даимийлиққа вә очуқлуққа игә” дәп тәкитлигән.

Ройтерсниң ейтишичә, хитай шималий корейә билән қоюқ мунасивитини сақлап кәлгән болсиму, йеқинқи бир қанчә йилдин буян шималий корейәниң ядро паалийәтлири хитайниму биарам қилишқа башлиған. Болупму, америка президенти доналд трампниң хитайни бу мәсилидә кәскин тәрәп тутушқа қистиши икки тәрәпниң мунасивәтлирини җиддийләштүрүвәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт