Amérika-shimaliy koréye mesilisidiki bésim artmaqta

Muxbirimiz irade
2017-04-20
Share


Amérika bilen shimaliy koréye otturisidiki jiddiylik sewebidin shimaliy koréyege qaritilghan diplomatik bésimlar küchiyiwatqan bir shara'itta xitayning bu mesilidiki rolining ajizlap méngiwatqanliqi bildürülmekte.

Birleshme agéntliqi bügün bu heqte élan qilghan xewiride, shimaliy koréye mesiliside xitayning muhim roli bolsimu, emma uning bara-bara öz rolini yoqitip, oyunning sirtida qéliwatqanliqini bayan qilghan.

Xewerde éytilishiche, xitay her da'im qilghandek amérika we shimaliy koréyeni mesilini diplomatik söhbet arqiliq tinchliq bilen hel qilish chaqiriqini qiliwatqan bolsimu, emma bu qétim amérika we shimaliy koréye mesilisi intayin jiddiy bolush birge, xitaygha kéliwatqan bésimmu her waqittikidin bek éghir iken.

Xitay shimaliy koréyeni bezi tedbirler arqiliq agahlandurup baqqan bolsimu, shimaliy koréye xitaygha anche perwa qilip ketmigen. Shuninggha oxshash amérika prézidénti trampmu "Waqti kelse biz xitaysizmu bu ishni bir terep qilimiz" dégenliki üchün xitayning shimaliy koréye mesilisini hel qilishta bek chong rolimu qalmighan.

Charshenbe küni yene, amérikining awam palata re'isi pa'ul rayin en'gliyediki ziyariti mezgilide söz qilip amérikining shimaliy koréye mesilisini hel qilghanda zörür tépilsa urush qilishtinmu yanmaydighanliqini tekitligen.

U: "Bir diktatorning qolida bundaq bir küchning bolushigha qarap turush, bir medeniyetlik dunya qilidighan ish emes. Elwette biz urush qilishni xalimaymiz. Emma barliq éhtimalliqlarni qollinishtin yanmaymiz" dégen.

Melum bolushiche, amérikining shimaliy koréye mesilisini qoral küchi arqiliq hel qilish oyi xitayda we rusiyede endishe peyda qiliwatqan bolup, bügün bir qisim axbarat organliri urush we urushtin kéyinki musapir krizisi éhtimalliqigha qarshi rusiyening özining chégra rayonlirigha 150 ming esker yötkigenlikini xewer qilghan, emma bu xewer téxi rusiyening resmiy organliri teripidin delillenmidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.