Piyongyangdiki may qachilash ponkitliri yerlik xéridarlarni ret qilishqa bashlighan

Koréye yérim arili weziyitining jiddiylishishige egiship, shimaliy koréyening paytexti piyongyangdiki bir qisim may qachilash ponkitliri mulazimet waqtini qisqartishqa yaki yerlik xéridarlarni ret qilishqa bashlighan.

Fokus xewerler torida körsitishiche, shuning bilen buninggha belkim xitay shimaliy koréyege éksport qilidighan bénzin miqdarini azaytqanliqi seweb bolghan bolushi mumkin, dégen gumanlar otturigha chiqqan.

Xewerge qarighanda, piyongyangdiki may qachilash ponkitliri jüme künidin bashlap mezkur sheherdiki diplomatlar we bashqa xelq'araliq shirketlerning aptomobillirighila mulazimet qalghandin bashqa, yerlik aptomobil igilirige mulazimet qilishini toxtatqan.

Xitay shimaliy koréyening eng chong néfit we bénzin teminligüchisi. Bezi xewerlerde shimaliy koréyege qaritilghan iqtisadiy jaza tüpeyli xitayning shimaliy koréyege éksport qilinidighan néfit miqdarini azaytqanliqi ilgiri sürülgen.

Halbuki, xitay bayanatchisi jüme künidiki axbarat élan qilish yighinida bu heqtiki so'allirigha ochuq jawab bérishtin özini qachurghan. Xitayning soda ministirliqimu bu heqte lam-jim démigen.

Nöwette shimaliy koréyede körülüwatqan bu xil özgirishning shimaliy koréyening yadur mesilisini hel qilish üchün yéngi élin'ghan soda cheklimisi bilen munasiwetlik yaki emesliki hazirche namelum.

Emma, charshenbe küni birleshken döletler teshkilati xewpsizlik kéngishi shimaliy koréyege qarita yéngi bir qatar iqtisadiy jaza élan qilghan. Bularning arisida shimaliy koréyediki bir qisim shexslerning mal-mülkini tonglitish qatarliqlarmu bar idi.