Пийоңяңдики май қачилаш понкитлири йәрлик херидарларни рәт қилишқа башлиған

Мухбиримиз җүмә
2017.04.22

Корейә йерим арили вәзийитиниң җиддийлишишигә әгишип, шималий корейәниң пайтәхти пийоңяңдики бир қисим май қачилаш понкитлири мулазимәт вақтини қисқартишқа яки йәрлик херидарларни рәт қилишқа башлиған.

Фокус хәвәрләр торида көрситишичә, шуниң билән буниңға бәлким хитай шималий корейәгә експорт қилидиған бензин миқдарини азайтқанлиқи сәвәб болған болуши мумкин, дегән гуманлар оттуриға чиққан.

Хәвәргә қариғанда, пийоңяңдики май қачилаш понкитлири җүмә күнидин башлап мәзкур шәһәрдики дипломатлар вә башқа хәлқаралиқ ширкәтләрниң аптомобиллириғила мулазимәт қалғандин башқа, йәрлик аптомобил игилиригә мулазимәт қилишини тохтатқан.

Хитай шималий корейәниң әң чоң нефит вә бензин тәминлигүчиси. Бәзи хәвәрләрдә шималий корейәгә қаритилған иқтисадий җаза түпәйли хитайниң шималий корейәгә експорт қилинидиған нефит миқдарини азайтқанлиқи илгири сүрүлгән.

Һалбуки, хитай баянатчиси җүмә күнидики ахбарат елан қилиш йиғинида бу һәқтики соаллириға очуқ җаваб бериштин өзини қачурған. Хитайниң сода министирлиқиму бу һәқтә лам-җим демигән.

Нөвәттә шималий корейәдә көрүлүватқан бу хил өзгиришниң шималий корейәниң ядур мәсилисини һәл қилиш үчүн йеңи елинған сода чәклимиси билән мунасивәтлик яки әмәслики һазирчә намәлум.

Әмма, чаршәнбә күни бирләшкән дөләтләр тәшкилати хәвпсизлик кеңиши шималий корейәгә қарита йеңи бир қатар иқтисадий җаза елан қилған. Буларниң арисида шималий корейәдики бир қисим шәхсләрниң мал-мүлкини тоңлитиш қатарлиқларму бар иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.