Шинзо абениң ясукуни бузругварлар мазарлиқини зиярәт қилиши хитай билән корейәни йәнә биарам қилған

Мухбиримиз қутлан
2013-12-27
Share

Дуняви чоң таратқуларниң хәвәр қилишичә, японийә баш вәзири шинзо абе 26-декабир күни ясукуни бузругварлар мазарлиқни зиярәт қилған.

Бу зиярәт шинзо абе иккинчи қетим баш вәзирлик тәхтигә чиқип дәл бир йил толған күнгә тоғра кәлгән.

Мәлум болушичә, японийәниң иккинчи дуня уруши мәзгилидики юқири дәриҗилик уруш җинайәтчилири ясукуни бузругварлар мазарлиқиға дәпнә қилинған болуп, хитай вә корейә қатарлиқ дөләтләр бу мазарлиқни японийә милитаризминиң символи дәп қарап кәлгән. Униң үстигә, шинзо абениң ясукуни зиярити хитайда мав зедоң туғулғанлиқиниң 120 йиллиқи хатирилиниватқан күнләргә тоғра кәлгәчкә хитай тәрәп бу ишқа қаттиқ етираз билдүргән.

Хитай ташқи ишлар министири ваң йи түнүгүн японийәниң хитайда турушлуқ баш әлчиси билән көрүшүп, шинзо абениң бу һәрикитини қаттиқ әйиблигән һәмдә японийә тәрәпниң бу “хаталиқ” ини етирап қилишни тәләп қилған. японийә тәрәп бу мәсилигә дәрһал инкас қайтуруп, “шинзо абениң ясукуни мазарлиқини зиярәт қилиши дөләт нами билән болған әмәс, у пүтүнләй өзиниң шәхсий һәрикити” дәп изаһат бәргән.

Шинзо абениң ясукуни бузругварлар мазарлиқини тавап қилиши йеқиндин буян хитай билән японийә оттурисидики күнсери җиддийлишиватқан кәйпиятни йәниму юқири пәллигә көтүргән. Көзәткүчиләр бу мунасивәт билән америка, хитай, японийә вә икки корейәни мәркәз қилған шәрқий асияниң көп қирлиқ вәзийитидики инчикә өзгиришләргә йәниму диққәт қилмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт