Shiwétsariye xitay bilen ötküzgen kishilik hoquq di'alogida Uyghur mesilisini otturigha qoyghan

Muxbirimiz erkin
2018-06-22
Élxet
Pikir
Share
Print

Shwétsariyening xitay bilen ötküzgen kishilik hoquq di'alogida Uyghurlarning kishilik hoquq mesilisi muzakire qilin'ghan.

Shiwétsariye fédiratsiye hökümiti torining xewiride ashkarilinishiche, 16‏-nöwetlik shiwétsariye-xitay kishilik hoquq diyalogi 11-we 12‏-iyun künliri béyjingda ötküzülüp, edliye mesililiri, ölüm jazasi we az sanliq milletler hoquqi qatarliq mesililer muzakire qilin'ghan.

Xewerde shiwétsariye terepning tibet we Uyghur aptonom rayonidiki az sanliq milletler hoquqini qoghdashni otturigha qoyghanliqi, "Bolupmu Uyghur rayonining kishilik hoquq weziyiti éghirliship kétiwatqanliqi, yüzminglighan Uyghurning "qayta-terbiyelesh lagérliri" gha qamilip, kishilik hoquqi éghir depsende qiliniwatqanliqini otturigha qoyghanliqi" tekitlen'gen.

Shiwétsariye-xitay köp tereplimilik kishilik hoquq diyalogi 1991‏-yili bashlan'ghan. Xitayning gherb döletliri bilen kishilik hoquq diyalogi élip bériwatqanliqigha uzun yillar bolghan bolsimu, lékin bu diyalogning ünümi we ehmiyiti kishilik hoquq teshkilatlirining gumanini qozghap kelgen. Bezi teshkilatlar bu diyalogning shekilge aylinip qalghanliqi, uning héchqandaq ünümi bolmighanliqini ilgiri sürüp, xitay bilen bolghan diyalogni bikar qilishni telep qilip keldi.

Shiwétsariye hökümet torining xewiride körsitilishiche, diyalogda shiwétsariye terep yene xitayni b d t kishilik hoquq méxanizmigha emel qilishqa chaqirip, ammiwi teshkilatlarning b d t kishilik hoquq kéngishi we bashqa xelq'ara organlargha qatnishishining muhimliqini tekitligen.

Xitayning b d t diki wekili bu yil 5‏-ayda d u q wekilining b d t yighinigha qatnishishigha kashila peyda qilip, yighinda amérika wekili bilen keskin munazire yüz bérishige seweb bolghan idi. Shiwétsariye hökümet torining xewiride ilgiri sürüshiche, shwétsariye terep diyalogda yene bezi konkrét shexsi délolarni otturigha qoyghan. Lékin xewerde qaysi konkrét délolarning otturigha qoyulghanliqini chüshendürmigen.

Toluq bet