Ситокһолмдики уйғур өсмүр арслан шиветсийә һөкүмитигә уйғурлар мәсилисини аңлатти

Мухбиримиз әзиз
2018.06.21

Уйғур дияридики сиясий бастурушлар дуня ахбаратлирида көпләп хәвәр қилиниватқанда уйғур дияри билән муәййән тарихий риштиси болған шиветсийәдә бу мәсилиниң тегишлик йосунда аңлитиливатқанлиқи мәлум.

Шиветсийәдики уйғур өсмүр арслан самсақниң йеқинда шиветсийә һөкүмитигә мәктуп йоллап уйғур җәмийити дуч келиватқан кризисларни мәлум қилиши әнә шу әһвалларниң биридур.

Мәлум болушичә, бу йил он яшқа киргән арслан самсақ йеқинда шиветсийә баш министири стефан лөвенға мәхсус мәктуп йоллиған һәмдә өзиниң аңлиғанлири вә билгәнлири асасида уйғур дияридики сиясий бастуруш һәрикәтлирини мәлум қилған. Шуниңдәк шиветсийә һөкүмитидин бу мәсилиләргә көңүл бөлүшини һәмдә хитай һөкүмитиниң бу хил йолсизлиқлирини тохтитишқа күч чиқиришни тәләп қилған.

15-Июн күни шиветсийә ташқи ишлар министири маргот валстрөм уйғур өсмүр арсланниң хетиға җаваб мәктуп язған. Җаваб мәктупта дөләтләр арисидики мунасивәтләргә четишлиқ мәсилиләргә ташқи ишлар министирлиқиниң мәсул болидиғанлиқини, шуңа өзиниң буниңға җаваб язғанлиқини билдүргән. Шуниңдәк арсланниң мушундақ бир зор иҗтимаий мәсилә һәққидә сиясийонларға мәктуп йоллаш ғәйритидин сөйүнгәнликини билдүргән.

Маргот валстрөмниң җаваб мәктупида йәнә шиветсийә һөкүмитиниң уйғурлар дуч келиватқан сиясий, мәдәнийәт вә диний саһәдики бастурушлардин хәвәрдар икәнлики, өзлириниңму уйғур дияридики вәзийәткә җиддий муамилә қиливатқанлиқи алаһидә баян қилинған. Шуниң билән биргә бейҗиңдики шиветсийә әлчиханисиниң бейҗиңдики алақидар һөкүмәт тармақлири билән мушу мәсилиләр һәққидә сөһбәттә болуватқанлиқини билдүргән.

Мәлум болушичә, уйғур дияридики сиясий бастуруш һәрикәтлири һәмдә шиддәт билән кеңийиватқан “йепиқ тәрбийәләш мәркәзлири” һәққидики мәлуматлар йеқиндин буян шиветсийәдики бир қисим ахбарат васитилиридин йәр алмақта икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.