Sitokholmdiki Uyghur ösmür arslan shiwétsiye hökümitige Uyghurlar mesilisini anglatti

Muxbirimiz eziz
2018-06-21
Share

Uyghur diyaridiki siyasiy basturushlar dunya axbaratlirida köplep xewer qiliniwatqanda Uyghur diyari bilen mu'eyyen tarixiy rishtisi bolghan shiwétsiyede bu mesilining tégishlik yosunda anglitiliwatqanliqi melum.

Shiwétsiyediki Uyghur ösmür arslan samsaqning yéqinda shiwétsiye hökümitige mektup yollap Uyghur jem'iyiti duch kéliwatqan krizislarni melum qilishi ene shu ehwallarning biridur.

Melum bolushiche, bu yil on yashqa kirgen arslan samsaq yéqinda shiwétsiye bash ministiri stéfan löwén'gha mexsus mektup yollighan hemde özining anglighanliri we bilgenliri asasida Uyghur diyaridiki siyasiy basturush heriketlirini melum qilghan. Shuningdek shiwétsiye hökümitidin bu mesililerge köngül bölüshini hemde xitay hökümitining bu xil yolsizliqlirini toxtitishqa küch chiqirishni telep qilghan.

15-Iyun küni shiwétsiye tashqi ishlar ministiri margot walström Uyghur ösmür arslanning xétigha jawab mektup yazghan. Jawab mektupta döletler arisidiki munasiwetlerge chétishliq mesililerge tashqi ishlar ministirliqining mes'ul bolidighanliqini, shunga özining buninggha jawab yazghanliqini bildürgen. Shuningdek arslanning mushundaq bir zor ijtima'iy mesile heqqide siyasiyonlargha mektup yollash gheyritidin söyün'genlikini bildürgen.

Margot walströmning jawab mektupida yene shiwétsiye hökümitining Uyghurlar duch kéliwatqan siyasiy, medeniyet we diniy sahediki basturushlardin xewerdar ikenliki, özliriningmu Uyghur diyaridiki weziyetke jiddiy mu'amile qiliwatqanliqi alahide bayan qilin'ghan. Shuning bilen birge béyjingdiki shiwétsiye elchixanisining béyjingdiki alaqidar hökümet tarmaqliri bilen mushu mesililer heqqide söhbette boluwatqanliqini bildürgen.

Melum bolushiche, Uyghur diyaridiki siyasiy basturush heriketliri hemde shiddet bilen kéngiyiwatqan "Yépiq terbiyelesh merkezliri" heqqidiki melumatlar yéqindin buyan shiwétsiyediki bir qisim axbarat wasitiliridin yer almaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet