Shöhret zakir: "Qayta-terbiyelesh lagérlirida qirghiz yoq"

Muxbirimiz erkin
2019-02-25
Élxet
Pikir
Share
Print

Uyghur aptonom rayonining re'isi shöhret zakir xitayning Uyghur diyaridiki "Qayta-terbiyelesh lagérliri" da qirghizlarning yoqluqini bildürgen.

Qirghizistanning "24 K g xewer agéntliqi" ning 25‏-féwral xewer qilishiche, qirghizistan tashqi ishlar ministirliqi mezkur agéntliqqa bergen uchurida shöhret zakirning Uyghur rayonidiki "Qayta terbiyelesh lagérlirida qirghiz yoq" dégenlikini bildürgen.

Shöhret zakir bu sözlerni qirghizistan tashqi ishlar ministiri chin'giz heyderbékof yéqinda Uyghur diyarini ziyaret qilip, uning bilen körüshkende qilghan. Heyderbékof 22‏-féwral küni Uyghur diyarida ziyarette bolghan idi.

"24 K g xewer agéntliqi" ning bildürüshiche, ziyarette bashqa nurghun mesililer qatarida rayondiki "Siyasiy qayta terbiyelesh lagérliri" da tutup turuluwatqan étnik qirghizlarning mesilisimu muzakire qilin'ghan. Shöhret zakir bu lagérlarning "Kespiy terbiyelesh orunliri" ikenliki, kishilerni her xil sahelerde terbiyeleydighanliqi, ularning bilim we kesip igilep, xizmet tépishigha yardem qilidighanliqini ilgiri sürgen.

Qirghizistan tashqi ishlar ministiri heyderbékofning ziyariti b d t kishilik hoquq kéngishining 25‏-féwral bashlan'ghan ministir derijilikler yighinining del harpisida élip bérilghan. Xelq'ara taratqular xitayning yighinda Uyghur rayonidiki lagérlar seweblik qattiq tenqidke uchrishidin endishe qiliwatqanliqini bildürgen.

"24 K g agéntliqi" ning xewiride bayan qilinishiche, "Qirghizistan tashqi ishlar ministirliqi shöhret zakirning yuqiriqi orunlardiki terbiyelen'güchilerning étnik terkibi toghrisida melumati yoqluqigha diqqet qilghan.

Uyghur rayonidiki taratqular chin'giz heyderbékofning Uyghur rayonida ziyarette bolup, shöhret zakir bilen körüshkenlikini xewer qilghan bolsimu, ularning lagérlar mesilisini muzakire qilghanliqi, heyderbékofning lagérlardiki qirghizlarni sürüshtürgenlikini tilgha almighan.

Amérika hökümitining ilgiri sürüshiche, nöwette 800 mingdin 2 milyon'ghiche Uyghur, qazaq we bashqa musulmanlar lagérlarda tutup turulmaqta iken.

Toluq bet