Шотландийәдики уйғурлар: «туғқанлиримизни қачан көримиз?»

Мухбиримиз әзиз
2020-10-20
Елхәт
Пикир
Share
Принт

Йеқинқи мәзгилләрдә барғансери әвҗ еливатқан уйғурлар дияридики сиясий бастуруш вә тәқибниң муһаҗирәттики уйғурларғиму еғир роһий бесим елип келиватқанлиқи һәмдә буниң нөвәттә һәрқайси җайлардики уйғурлар үчүн ортақ қисмәткә айлиниватқанлиқи мәлум болмақта. «Шотландийә телевизийиси хәвәрлири» ниң 20-өктәбир санида әнглийәдики уйғурларни мисал қилған һалда бу әһвал йәнә бир қетим тәкитләнди.

Тәсним нәзәр имзасидики бу мақалида 2015-йилидин буян шотландийәдә муһаҗирлиқ һаятини башлиған абдуләһәд аилисиниң сәрсанлиқ қисмити арқилиқ нөвәттики пүткүл уйғур миллити дуч келиватқан иҗтимаий паҗиә йорутуп берилгән. Болупму абдуләһәдниң бир пуқра үчүн әқәллий һәқләрдин һесаблинидиған паспорт үчүн хитай «бидик» лиригә 30 миң америка доллири пара бериши, аялиниң һамилә чүшүрүветиш хәвпигә дуч келиши, сиңиллириниң мәҗбури туғмас қиливетилиши дегәнләргә қошулуп әмдиликтә вәтәндә қалған уруқ-туғқанлириниң өлүк-тирикиниму билиш имканийитиниң болмаслиқи уни аилә бойичә еғир роһий бесимға гириптар қилмақта икән. У бу һәқтә мухбирларға сөз қилип «һазир уруқ-туғқанлиримизниң дидарини бир көрүвелиш биз үчүн әң зор бәхт» дегән.

Әһмәд аилиси болса һазирғичә вәтәндә қалдуруп қойған икки пәрзәнтини әнглийәгә елип келишкә илаҗ қилалмастин аилә җудалиқиниң дәрдидә пучулинип йүриватқан миңлиған уйғурларниң бири. Гәрчә йеқиндин буян бир қисим парламент әзалири әһмәдкә охшаш қисмәткә дучар болуватқан уйғурларниң дәрдигә дәрман болуш һәққидә бәзи паалийәтләрдә болуватқан болсиму буниңда техи әмилий тәдбир елиш басқучиға өтмигән. Шу сәвәбтин уруқ-туғқанлири билән болған бу хил җудалиқниң қачанғичә давам қилишиға һечким бирнәрсә дейәлмәйдикән. Әнглийәдики уйғур паалийәтчи рәһимә мәһмут бу һәқтә сөз қилип: «һазир бизниң вәтинимиздә қирғинчилиқ болуватиду. Шуңа һөкүмитимиз әмди һәркәткә өтмисә болмайдиған йәргә берип қалди» дегән.

Пикирләр (0)
Share
Толуқ бәт