Shotlandiyediki Uyghurlar: "Tughqanlirimizni qachan körimiz?"

Muxbirimiz eziz
2020-10-20
Share

Yéqinqi mezgillerde barghanséri ewj éliwatqan Uyghurlar diyaridiki siyasiy basturush we teqibning muhajirettiki Uyghurlarghimu éghir rohiy bésim élip kéliwatqanliqi hemde buning nöwette herqaysi jaylardiki Uyghurlar üchün ortaq qismetke ayliniwatqanliqi melum bolmaqta. "Shotlandiye téléwiziyisi xewerliri" ning 20-öktebir sanida en'gliyediki Uyghurlarni misal qilghan halda bu ehwal yene bir qétim tekitlendi.

Tesnim nezer imzasidiki bu maqalida 2015-yilidin buyan shotlandiyede muhajirliq hayatini bashlighan abdul'ehed a'ilisining sersanliq qismiti arqiliq nöwettiki pütkül Uyghur milliti duch kéliwatqan ijtima'iy paji'e yorutup bérilgen. Bolupmu abdul'ehedning bir puqra üchün eqelliy heqlerdin hésablinidighan pasport üchün xitay "Bidik" lirige 30 ming amérika dolliri para bérishi, ayalining hamile chüshürüwétish xewpige duch kélishi, singillirining mejburi tughmas qiliwétilishi dégenlerge qoshulup emdilikte wetende qalghan uruq-tughqanlirining ölük-tirikinimu bilish imkaniyitining bolmasliqi uni a'ile boyiche éghir rohiy bésimgha giriptar qilmaqta iken. U bu heqte muxbirlargha söz qilip "Hazir uruq-tughqanlirimizning didarini bir körüwélish biz üchün eng zor bext" dégen.

Ehmed a'ilisi bolsa hazirghiche wetende qaldurup qoyghan ikki perzentini en'gliyege élip kélishke ilaj qilalmastin a'ile judaliqining derdide puchulinip yüriwatqan minglighan Uyghurlarning biri. Gerche yéqindin buyan bir qisim parlamént ezaliri ehmedke oxshash qismetke duchar boluwatqan Uyghurlarning derdige derman bolush heqqide bezi pa'aliyetlerde boluwatqan bolsimu buningda téxi emiliy tedbir élish basquchigha ötmigen. Shu sewebtin uruq-tughqanliri bilen bolghan bu xil judaliqning qachan'ghiche dawam qilishigha héchkim birnerse déyelmeydiken. En'gliyediki Uyghur pa'aliyetchi rehime mehmut bu heqte söz qilip: "Hazir bizning wetinimizde qirghinchiliq boluwatidu. Shunga hökümitimiz emdi herketke ötmise bolmaydighan yerge bérip qaldi" dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.