Uyghur diyaridiki siyasiy basturushning téximu zor kölem alidighanliqi algha sürülmekte

Muxbirimiz eziz
2021-06-30
Share

Xitay hökümiti bashqurushidiki "Tengritagh tori" ning 30-iyundiki xewiride éytilishiche, xitay hökümitining "Memliket boyiche siyasiy qanun sépini tertipke sélish 16-mupettish guruppisi" Uyghur diyarida mexsus pikir élish yighini achqan. Bu yighin'gha Uyghur diyaridiki chén chüen'go, wang jünjéng, wang mingshen qatarliq eng yuqiri derijilik xitay emeldarlar toluq qatnashqan.

Xewerde éytilishiche, merkezdin kelgen mupettish guruppisi "Shinjangdiki siyasiy qanun sépini tertipke sélishning birinchi basquchi ongushluq orunlan'ghan. Ijtima'iy muqimliq we uzun mezgillik eminlik üchün puxta asas sélin'ghan" dep xulase chiqarghan. Shuning bilen birge bundin kéyinki xizmetler üchün "Muhim yip uchi we muhim délolarni bir yaqliq qilishni kücheytish, jahil we tosqunluq peyda qilghuchi barliq amillarni üzül-késil tazilash, siyasiy qanun sépini téximu kéngeytish" dégendek wezipilerni orunlash lazimliqini tekitligen.

Uyghur aptonom rayonining partiye sékrétari chén chüen'go bolsa "Partiye merkizi komitétining yéngi dewrdiki shinjangni idare qilish tedbirini qet'iy we toluq ijra qilip, térrorluqqa qarshi turush we ijtima'iy muqimliq yaritishqa zéhin qoyidighanliqini" bildürgen.

Melum bolushiche, Uyghur diyaridiki siyasiy basturushni aktip ijra qilghuchi küchlerning biri bolghan Uyghur aptonom rayonluq siyasiy qanun komitétining mudiri wang mingshen eyni waqitta chén chüen'go qatarliq birqisim xitay emeldarliri bilen birlikte amérika hökümitining imbargo jazasigha uchrighanidi. Amérika hökümiti bu heqtiki qararda "Bu kishiler lagér sistémisi berpa qilish hemde insaniyetke qarshi jinayet sadir qilish bilen eyiblinip imbargogha uchridi" dégenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet