Jang chünshyen siyasiy byuro ezaliqidin qaldurulghan, chén chüen'go siyasiy byurogha kirgen

Muxbirimiz erkin
2017.10.27

Xitay kompartiyesining yéngi teshkil qilin'ghan merkizi komitéti charshenbe küni tunji nöwetlik yighinini chaqirip, 25 kishilik siyasiy byuro ezalirini teyinligen.

Uyghur aptonom rayonluq partkomning sabiq sékrétari, “Shinjang xizmiti rehberlik guruppisi” ning mu'awin bashliqi jang chünshyen siyasiy byuro ezaliqidin qaldurulghan.

Xongkongda chiqidighan “Jenubiy xitay etigenlik géziti” ning bildürüshiche, bu yil 64 yashliq jang chünshyenning yéshi téxi toshmay turup, uning siyasiy byuro ezaliqidin qaldurulushi diqqet qozghaydiken.

Xewerde yene jang chünshyen bilen bille xitayning mu'awin re'isi li yüenchaw, merkizi teshwiqat bölümining bashliqi lyu chibawningmu siyasiy byuro ezaliqidin qaldurulghanliqi bildürülgen. Alaqidar da'iriler hazirgha qeder jang chünshyenning néme üchün siyasiy byurodin qaldurulghanliqigha chüshenche bérip baqmighan.

Xitay kompartiyisining bu qétimqi qurultiyida yene Uyghur aptonom rayonluq partkomning sékrétari chén chüen'go siyasiy byurogha kirgen. Közetküchilerning bildürüshiche, chén chüen'goning siyasiy byurogha kirishi, uning Uyghur rayonidiki yéqinqi bir yilliq qattiq qol siyasitini mu'eyyenleshtürgenlik bolup, bu chén chüen'goning qattiq qol siyasitini téximu qopalliq bilen ijra qilishigha “Yéshil chiragh” yéqip bergenlik iken.

Xitay axbarat wasitilirining xewer qilishiche, chén chüen'go 19‏-qurultay yépilishigha derhal “Shinjang wekilliri” ning yighinini chaqirip, “19-Qurultay rohini öginish we teshwiq qilish we emeliyleshtürüsh dolquni qozghash” ni telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.