Хитайниң уйғур районида йеңи бир нөвәтлик сиясий долқун қозғиғанлиқи мәлум болмақта

Мухбиримиз ирадә
2019-11-25
Елхәт
Пикир
Share
Принт

Хитай һөкүмитиниң уйғур елидә болупму җәнубтики уч вилайәт бир областта ши җинпиң оттуриға қойған «әслий мәқсәтни унтумай, бурчни әстә сақлаш», ши җинпиңниң йеңи дәвр җуңгочә сотсиялизм идийәсини өгиниш, шинҗаңни идарә қилиш тәдбирини изчиллаштуруш» қа охшаш бир қатар сиясий һәрикәтләрниң йәнә бир балдақ өрлигәнлики мәлум болмақта.

Қәшқәр хәвәрләр торида тарқитилған йәнә бир хәвәрдин мәлум болушичә, һазир җайларда 2-түркүмдики «баш тема тәрбийәси» қанат яйдурулмақтикән. Хәвәрдә конишәһәр наһийәсиниң бу җәһәттә қилған хизмәтлири һәққидә төвәндикиләр баян қилинған: «конишәһәр наһийәсидики вәтәнпәрвәрлик, миннәтдарлиқ тәрбийәси базиси, милләтләр иттипақлиқи көргәзмә сарийида екскурсийә-өгиниш әп берилди. Баш шуҗи ши җинпиңниң конишәһәр наһийәсидә хизмәтләрни тәкшүргәндә қилған муһим сөзини қайта ядқа елинди. . . Конишәһәр наһийәлик интизам тәкшүрүш комитети, ревизийә комитети йәнә наһийәлик радийо-телевизийә истансиси билән бирлишип «төвән чәкни йоқитишниң бәдили» намлиқ ибрәт тәрбийәси филимини сүрәткә алди»

Хәвәрдин қариғанда, конишәһәр наһийәсидики кадир-амма һәммиси бирдәк «мәсилә тапшуруш» қа орунлаштурулған болуп, униңда төвәндикиләр дейилгән: «. . . Пүтүн наһийәдики һәр дәриҗилик рәһбирий кадирлар өзини тәтбиқлап сиясий йүксәклик, нәзәрийә өгиниш, баш мәқсәт еңи, иқтидар-сәвийәси қатарлиқ җәһәтләрдики мәсилидин 1268ни тепип чиқти. . . Деһқан аилилирини зиярәт қилиш, пикир елиш җәдвили тарқитиш, пикир сандуқи тәсис қилиш. . . Қатарлиқ шәкилләр арқилиқ аммидин кәң даиридә пикир-тәклип алди. 788 Аилини зиярәт қилип, қалдурулған сөз вә пикирдин 973ни қобул қилди».

Хитайниң шинхуа тори тарқатқан хәвәрдин қариғанда, уйғур аптоном районлуқ парткомниң муавин секретари ли пеңшинму йеқинда қәшқәр шәһири вә мәкит наһийәлирини зиярәт қилип, юқиридики бу сиясәтләрниң қәтий әмәлийләштүрүш, баш тема тәрбийәсиниң юқири сүпәттә қанат яйдурулушиға капаләтлик қилишни тәкитлигән икән.

Йеқиндин буян, уйғур елидә ши җинпиңниң баш нишанини изчиллаштурушниң немә үчүн бунчә қаттиқ тәкитләватқанлиқи намәлум. Бирақ чәтәлләрдики көзәткүчиләр буни хитай компартийәсиниң лагерларға аит ички һөҗҗәтлириниң ашкарилинип кетиши билән мунасивәтлик, дәп қаримақта.

Пикирләр (0)
Share
Толуқ бәт