Xitayning Uyghur rayonida yéngi bir nöwetlik siyasiy dolqun qozghighanliqi melum bolmaqta

Muxbirimiz irade
2019-11-25
Élxet
Pikir
Share
Print

Xitay hökümitining Uyghur élide bolupmu jenubtiki uch wilayet bir oblastta shi jinping otturigha qoyghan "Esliy meqsetni untumay, burchni este saqlash", shi jinpingning yéngi dewr junggoche sotsiyalizm idiyesini öginish, shinjangni idare qilish tedbirini izchillashturush" qa oxshash bir qatar siyasiy heriketlerning yene bir baldaq örligenliki melum bolmaqta.

Qeshqer xewerler torida tarqitilghan yene bir xewerdin melum bolushiche, hazir jaylarda 2-türkümdiki "Bash téma terbiyesi" qanat yaydurulmaqtiken. Xewerde konisheher nahiyesining bu jehette qilghan xizmetliri heqqide töwendikiler bayan qilin'ghan: "Konisheher nahiyesidiki wetenperwerlik, minnetdarliq terbiyesi bazisi, milletler ittipaqliqi körgezme sariyida ékskursiye-öginish ep bérildi. Bash shuji shi jinpingning konisheher nahiyeside xizmetlerni tekshürgende qilghan muhim sözini qayta yadqa élindi. . . Konisheher nahiyelik intizam tekshürüsh komitéti, réwiziye komitéti yene nahiyelik radiyo-téléwiziye istansisi bilen birliship "Töwen chekni yoqitishning bedili" namliq ibret terbiyesi filimini süretke aldi"

Xewerdin qarighanda, konisheher nahiyesidiki kadir-amma hemmisi birdek "Mesile tapshurush" qa orunlashturulghan bolup, uningda töwendikiler déyilgen: ". . . Pütün nahiyediki her derijilik rehbiriy kadirlar özini tetbiqlap siyasiy yükseklik, nezeriye öginish, bash meqset éngi, iqtidar-sewiyesi qatarliq jehetlerdiki mesilidin 1268ni tépip chiqti. . . Déhqan a'ililirini ziyaret qilish, pikir élish jedwili tarqitish, pikir sanduqi tesis qilish. . . Qatarliq shekiller arqiliq ammidin keng da'iride pikir-teklip aldi. 788 A'ilini ziyaret qilip, qaldurulghan söz we pikirdin 973ni qobul qildi".

Xitayning shinxu'a tori tarqatqan xewerdin qarighanda, Uyghur aptonom rayonluq partkomning mu'awin sékrétari li péngshinmu yéqinda qeshqer shehiri we mekit nahiyelirini ziyaret qilip, yuqiridiki bu siyasetlerning qet'iy emeliyleshtürüsh, bash téma terbiyesining yuqiri süpette qanat yaydurulushigha kapaletlik qilishni tekitligen iken.

Yéqindin buyan, Uyghur élide shi jinpingning bash nishanini izchillashturushning néme üchün bunche qattiq tekitlewatqanliqi namelum. Biraq chet'ellerdiki közetküchiler buni xitay kompartiyesining lagérlargha a'it ichki höjjetlirining ashkarilinip kétishi bilen munasiwetlik, dep qarimaqta.

Toluq bet