Хитай һөкүмити уйғур елидики “сиясий муһитни саплаштуруш” намида уйғур әмәлдарлириға давамлиқ зәрбә бәрмәктә

Мухбиримиз ирадә
2019.10.31

28-Өктәбир күни “хитай хәвәрләр тори” да тарқитилған бир хәвәргә қариғанда, уйғур аптоном районлуқ партком вә интизам тәкшүрүш комитети йеқинда уйғур елиниң орманчилиқ вә чарвичилиқ саһәсигә қарита “түптин өзгәртиш вә сиясий муһитни саплаштуруш” һәрикити йүргүзүш һәққидә қарар чиқарған. Хәвәрдә ейтилишичә, даириләрниң бундақ қарар чиқиришиға орманчилиқ назаритиниң алдинқи 3 нөвәтлик рәһбәрлириниң һәммисиниң “интизамға еғир дәриҗидә хилаплиқ қилиш” вәқәсиниң ашкарилинип бир тәрәп қилиниши билән мунасивәтлик икән. Хәвәрдә ейтилишичә, орманчилиқ назаритиниң 3 нөвәтлик рәһбиридә көрүлгән бу “мәсилә” аптоном районлуқ парткомниң диққитини қозғап, бу саһәдики “сиясий екологийә” ни түзәшни зөрүр, дәп қариған.

2017-Йили 3-айда хитайдики хәвәр торлири шинҗаң уйғур аптоном районлуқ орманчилиқ назаритиниң назири ниҗат мәхмутниң “интизамға еғир хилаплиқ қилғанлиқ” сәвәбидин “тәкшүрүлүватқанлиқи” ни хәвәр қилған.

Андин даириләр йәнә орманчилиқ назаритиниң 2008-йили аллиқачан пенсийәгә чиқип болған сабиқ назири мәмәт абдулланиму қолға алған. Радийомиз униң 2017-йили “икки йүзлимичилик” билән әйиблинип тутқун қилинғанлиқини дәлиллигән иди.

Хитай һөкүмити уйғур елидә 2017-йилидин бери “икки йүзлимичиләргә қарши туруш” вә “қара гуруһ” ларға, “муһапизәт күнлүки” гә қарши туруш дегәндәк намлар астида нурғун уйғур әмәлдарлирини бир тәрәп қилған иди.

“тәңритағ тори” ниң хәвәр қилишичә, даириләр йеқинда йәнә уйғур аптоном районлуқ мейипләр бирләшмиси партгурупписиниң әзаси, бирләшминиң муавин башлиқи муһәммәт ниязни “интизамға, қанунға еғир хилаплиқ қилғанлиқ” гумани билән тәкшүрүшкә алған болуп, у нөвәттә аптоном районлуқ интизам тәкшүрүш комитети, ревизийә комитети тәрипидин тәкшүрүлмәктикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.