Xitay hökümiti Uyghur élidiki “Siyasiy muhitni saplashturush” namida Uyghur emeldarlirigha dawamliq zerbe bermekte

Muxbirimiz irade
2019.10.31
Share on WhatsApp
Share on WhatsApp

28-Öktebir küni “Xitay xewerler tori” da tarqitilghan bir xewerge qarighanda, Uyghur aptonom rayonluq partkom we intizam tekshürüsh komitéti yéqinda Uyghur élining ormanchiliq we charwichiliq sahesige qarita “Tüptin özgertish we siyasiy muhitni saplashturush” herikiti yürgüzüsh heqqide qarar chiqarghan. Xewerde éytilishiche, da'irilerning bundaq qarar chiqirishigha ormanchiliq nazaritining aldinqi 3 nöwetlik rehberlirining hemmisining “Intizamgha éghir derijide xilapliq qilish” weqesining ashkarilinip bir terep qilinishi bilen munasiwetlik iken. Xewerde éytilishiche, ormanchiliq nazaritining 3 nöwetlik rehbiride körülgen bu “Mesile” aptonom rayonluq partkomning diqqitini qozghap, bu sahediki “Siyasiy ékologiye” ni tüzeshni zörür, dep qarighan.

2017-Yili 3-ayda xitaydiki xewer torliri shinjang Uyghur aptonom rayonluq ormanchiliq nazaritining naziri nijat mexmutning “Intizamgha éghir xilapliq qilghanliq” sewebidin “Tekshürülüwatqanliqi” ni xewer qilghan.

Andin da'iriler yene ormanchiliq nazaritining 2008-yili alliqachan pénsiyege chiqip bolghan sabiq naziri memet abdullanimu qolgha alghan. Radiyomiz uning 2017-yili “Ikki yüzlimichilik” bilen eyiblinip tutqun qilin'ghanliqini delilligen idi.

Xitay hökümiti Uyghur élide 2017-yilidin béri “Ikki yüzlimichilerge qarshi turush” we “Qara guruh” largha, “Muhapizet künlüki” ge qarshi turush dégendek namlar astida nurghun Uyghur emeldarlirini bir terep qilghan idi.

“Tengritagh tori” ning xewer qilishiche, da'iriler yéqinda yene Uyghur aptonom rayonluq méyipler birleshmisi partguruppisining ezasi, birleshmining mu'awin bashliqi muhemmet niyazni “Intizamgha, qanun'gha éghir xilapliq qilghanliq” gumani bilen tekshürüshke alghan bolup, u nöwette aptonom rayonluq intizam tekshürüsh komitéti, réwiziye komitéti teripidin tekshürülmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.