Xitay ma'arip ministiri: “Oqughuchilar siyasiy öginishke chaghanda öyige aldirighandek qizghin boluwatidu!”

Béyjingdiki xitay memliketlik xelq qurultiyi yighinida söz qilghan xitayning ma'arip ministiri chén bawshéng, xitaydiki aliy mektep oqughuchilirining yéqindin buyan siyasiy öginishlerge qarita qizghinliqining intayin yuqiri boluwatqanliqini, buni xuddi chaghanda öyige qaytishqa aldirawatqan kishilerning qizghin keypiyatigha oxshatqili bolidighanliqini ilgiri sürgen.

Roytérs agéntliqining bügünki xewiride bayan qilinishiche, xitay ma'arip ministiri bu yil oqughuchilardiki bu xil “Ilgirilesh” ni bayan qilghanda ötken yilqi nachar weziyetnimu tilgha élishtin saqlinalmighan.

U, ötken yili siyasiy öginishlerning zérikishlikliki sewebidin oqughuchilarning jismi dersxanida bolsimu rohining sirtta bolghanliqini étirap qilghan.

U yene 200 din artuq mutexessisni uniwérsitétlargha ewetish, 30000 qétimdin artuq kurs échish arqiliq mezkur weziyetni özgertkenlikini ilgiri sürgen. Halbuki, roytérs agéntliqi bu heqtiki xewiride xitayda tetqiqatchilar bilen oqughuchilarning némini déyish we némini oylishiningmu qattiq kontrol astida ikenlikining dunyagha sir emesliki eskertilgen.

Roytérs agéntliqining xewiride yene xitayning torni 24 sa'et nazaret qilish arqiliq selbiy mezmundiki jama'et pikirini öchürüwatqanliqini, uniwérsitétlargha “Parixorluqqa qarshi xizmet guruppisi” nami astida kadir ewetip, oqutquchilarning dersxanidiki léksiyelirinimu ting-tinglawatqanliqini bayan qilip ötken.