Бирләшмә агентлиқ: «хитай ‹иҗтимаий җинайәтчиләр' нами астида сиясий өктичиләрни уҗуқтуруватиду»

Мухбиримиз шөһрәт һошур
2018-03-16
Елхәт
Пикир
Share
Принт

Бирләшмә агентлиқниң бүгүн хәвәр қилишичә, хитайниң бу йил 1‏-айда мәмликәт миқясида башланған тәшкиллик иҗтимаий җинайәтләргә қарши һәрикәт долқуни иҗтимаий муқимлиқни әмәс, бәлки сиясий муқимлиқини, йәни хитай компартийәсиниң һакимийитигә қарши тәһдитләрни бир тәрәп қилиш маһийитидә давам қилмақтикән.

Хәвәрдә дейилишичә, мәзкур һәрикәт башланған дәсләпки айдила хитай бойичә 10 миңдин артуқ киши тутулған. Буларниң хели бир қисимни адвокатлар вә әрздарлар қатарлиқ хитайниң нөвәттики һакимийәт қатлимидин нарази кишиләр игилигән.

Шинхуа агентлиқиму мәзкур долқун һәққидики хәвиридә бу һәрикәтниң дәсләптә җамаәт хәвпсизликлини нишанлиған болса, әмдиликтә асасий қатламдики һакимийәтни мустәһкәмләшни көзләватқанлиқини йошурмиған.

Бирләшмә агентлиқниң бу һәқтики хәвиридә иҗтимаий җинайәтчиләргә қарши долқунниң тибәт вә уйғур районида «бөлгүнчиликкә зәрбә бериш» долқуниға айланғанлиқи илгири сүрүлгән. Әмма муһаҗирәттики бәзи уйғур көзәткүчиләр, хитайда мәмликәт бойичә қозғалған бу иҗтимаий җинайәтчиләргә қарши һәрикәт долқуниниң уйғур районида бултур 3‏-айдин башлап кеңәйгән вә давам қиливатқан «йепиқ тәрбийә» долқуниға нисбәтән көп аҗиз икәнликини, уйғур районида бу долқунға нишан болғудәк кишиләрниң асасән лагерларға қамилип болғанлиқини, шуңа бу долқунниң уйғур районида бир тәсир пәйда қилиш еһтималиниң азлиқини илгири сүрди.

Пикирләр (0)
Share
Толуқ бәт